"عروسة
المولد و بابا نويل"
مولد نبوي سعيد وعيد ميلاد مجيد
سنة 2015 مختلفة بكافة المقاييس وده مش لأنها مليانة احداث اغرب من بعض
وكان فيها شهور مبتخلصش زى فبراير واغسطس ،واننا احتفلنا بمولد النبي فى أولها ،
لكن كمان السنة تحمل حدث جلل يحدث لأول مرة منذ 457 سنة ، حيث يترافق الميلادين
سيدنا المسيح وسيدنا محمد عليهم صلاة الله وتسليماته.
الصدفة الاولى بين الميلادين حصلت سنة 1558م/ 966هـ وساعتها تصادف مولد
النبي 12 ربيع الاول مع 25 و26 ديسمبر.
الميلادين مش بس جايين فى نفس الميعاد لكنهم كمان فيهم صفات مشتركة كتيرة ،
يعنى مثلاً هما الاتنين عيدين أكل ، مولد النبي هو موسم حلاويات مولد النبي اللى
بيحبها المسلمين والمسحيين كمان ، فولية وسمسمية وحمصية وملبن وهريسة ومكسرات
بكافة الاشكال والانواع وسكريات للصبح.
كمان ميلاد المسيح بيكون ميعاد إفطار بعد صوم الميلاد ، يعنى هيتم تحضير مالذ وطاب من اصناف الطعام الشهية ، والاطعمة اللى تم افتقادها وقت الصيام هتبقى على السفرة ، فته ولحمة ومحشي وفراخ وحمام محشي ومسقعة باللحمة المفرومة...الخ
التشابه التانى فى الزينة اللى فى صدارة الموقف ، مع مولد النبي هتشوفها فى
عروسة المولد وفستانها وألوانه المختلفة والعريس وحصانه وألوانه الحلوة ومنها تدخل
على زينة عيد الميلاد واللى هتلاقيها جنب نفس المحل اللى بيبع حلاوة المولد وعروسة
المولد ، هتلاقى شجر الكريسماس الأخضر بأنواره وزينته ، وبابا نويل بأحجام مختلفة
وكتيرة وبحركات راقصة كمان.
التشابة الثالث بقى أحلى تشابه فيهم كلهم واللى هو موكب مولد النبي وحالة
خاصة من البهجة والجمال بتقام فى معظم محافظات مصر وبيتم فيها توزيع الشربات على
الناس فى الشوارع وتوزيع الحلويات على الاطفال اللى بيقبلوهم فى الشارع بحيث يكون
الموكب " ذكر وزفة وحلوى " ده طبعا غير ليالي الذكر اللى بيتم أقامتها
فى جميع المساجد على كافة المحافظات واللى بيتم فيها قراءة ماتيسير من القران
الكريم والقاء اشعار فى مدح النبي محمد صلى الله عليه وسلم.
ثم يجئ دور قداس عيد الميلاد المجيد واللى عادة بيتم أقامته فى الكاتدرائية
بالعباسية وبتقوم الكنيسة من دلوقتى بالتحضير للقداس الكبير واللى بيقام بحضور
قداسه البابا تواضروس الثانى بابا الاسكندرية وبطريرك الكرازة المركسية ،وطبعا
بيحضره الآلآف من الشعب والشخصيات العامة.
الاستمتاع الحقيقي للميلادين بالطريقة العظيمة دى مبيحصلش غير فى بلدنا
الحلوة مصر، أنزل الشوارع واستمتع بالروح الحلوة دى وانبسط انت وعائلتك واصحابك ، وكل
سنة واحنا طييبين ومبسوطين .
ليست هناك تعليقات:
إرسال تعليق