فكر مرتين قبل ما تشترى نظارة شمس رخيصة!

 

ياترى فعلاً مينفعش نستخدم اى نظارة شمس والسلام؟ ولازم النظارة تكون بمواصفات معينة وتكون أصلية؟! ياترى فعلا النظارات اللى معروضة فى المحلات، وبتكون مجهولة المصدر خطر؟!

وهل صحيح فعلاً انك ما تستخدمش نظارة شمس من أصله أحسن من استخدامك لنظارة مجهولة المصدر؟ ولا دى مجرد خدعة تسويقية من الشركات الكبيرة علشان تبيع نظاراتها؟

الأسئلة الكتيرة دى جاوب عليها أطباء العيون بالتالى:

الهدف اساسا من النظارات الشمسية هو وقاية العين من الآثار السلبية لأشعة الشمس وخصوصاً الأشعة فوق البنفسجية، واستخدام نظارات الشمس مجهولة المصدر بيعرض العين للخطر لأنها مش بتحجب الاشعة الفوق بنفسجية عن العين لإنها مش أسطح عاكسة زى باقى النظارات الشمسية المعروفة! يعنى انت لما بتستخدم النظارة دى بتضُر نفسك وبتعرض عيونك لخطر الاصابة بأمراض العين زى إعتام عدسة العين أو المياه البيضا، او امراض بالشبكية لا قدر الله.

عشان كده مهم جدا وانت بتشترى نظارة شمسية تتأكد من مصدرها وتعرف هل فعلا النظارة دى هتحمى عيونك من الأشعة فوق البنفسجية ولا لأ ؟

وياريت لو بتستخدم نظارة شميسة مجهولة المصدر تتخلص منها فوراً، لان عدم استخدام نظارة شمس من أصله أحسن لك من استخدم نظارة شمس تضُرك.

أسئله شائعه حول عمليات شفط الدهون؟

 

•من هم الأشخاص الأكثر انتفاعا من عمليات شفط الدهون؟

عمليه شفط الدهون تناسب أى شخص لديه تكتل وتجمع دهون فى منطقه يصعب اٍزالتها عن طريق الأنظمة الغذائيه والرياضه ومن أكثر الاماكن شيوعا عند الرجال منطقة الكرش والصدر وعند السيدات منطقه البطن والفخذين. والغرض الأساسى من إجراء هذه العملية هو إٍعاده شكل الجسم لشكله الطبيعى فى أسرع وقت.

•ما هى موانع إجراء شفط الدهون؟

لا توجد موانع نهائيا لإجراء العمليه، حيث أنها تتم فى وقت قصير ولا تحتاج إلى إقامة بالمستشفى

•ماذا يحدث داخل غرفة العمليات؟

تعتمد عمليه شفط الدهون على استخدام جهاز لأزالة الدهون ومن ثم شفطها إلى الخارج، وهذة هى الطريقه الكلاسيكيه لشفط الدهون. وحديثا يستخدم جهاز الليزر فى إذابة الدهون كما يساعد على شد الجلد بعد العمليه.

•ما هو المتوقع بعد شفط الدهون؟

•يعود المريض لمزاولة حياته الطبيعيه بعد وقت قصير

•ينصح بلبس الحزام الضاغط لفتره بعد العمليه

•ينصح بشرب كميات كبيره من السوائل فى الأيام الأولى بعد العمليه.

•هل يمكن التخلص من التجاعيد بواسطة إعادة حقن الدهون التى ازيلت من الجسم؟

بالتأكيد يمكن إعادة حقن الدهون التى أخذت من الجسم بعد معالجتها بتقنيه حديثه بهدف إزاله التجاعيد مثل إعاده حقنها فى منطقه الخد.

أسطورة السجادة الحمراء.. متى ظهرت وإيه أهميتها؟

السجادة الحمراء اللى بنشوفها كتير اليومين دول، سواء فى مهرجانات عالمية أو محلية أو أى احتفالات

السجادة الحمراء قبل ماتتحول ويكون من حق أى حد يمشى عليها سواء مغنى أو ممثل أو حتى شخص عادى، كانت ذو أهمية كبيرة ومميزة فعلاً وتعتبر من وسائل تبجيل واحتفال بالآلهة عند الإغريق !

أول ذكر للسجادة الحمراء كان فى مسرحية «أجاممنون» للكاتب المسرحى الإغريقى «إيسكيلس» فى المسرحية زوجة أجاممنون «كليتمنيسترا» بتحضر السجادة لزوجها اللى رجع منتصر من حرب «طروادة» للاحتفال بانتصاره. بس الحقيقة إن السجادة كان غرضها الحقيقى ليس الاحتفال، لكنها كانت مكيدة من « كليتمنيسترا « للإنتقام وكان سبب انتقام الزوجة هنا أن زوجها أجاممنون «زير نساء» !!

وبرغم ان اجاممنون كان عند إحساس بالمكيدة المدبرة ضده، لكنه خاف من غضب الآلهة عليه وخصوصاً الإله «زيوس» لأن من ضمن تقليد الأنتصار وتبجيل الآلهة هو المشى على السجادة الحمراء، وكمان زوجته أقنعته ان مفيش خطر حقيقى من المشى على السجادة الحمراء، وانه مش طبيعى أبدا ان المنتصر فى حرب «طروادة « يكون خايف من المشى على سجادة !!

والحقيقة ان أجاممنون خالف إحساسه وسمع كلام زوجته وفعلا مشى على السجادة الحمراء بكل فخر واعتزاز بالنفس علشان يلاقى فى آخرها عشيق زوجته واللى بيقوم بقتله !

أول أستخدام رسمى للسجادة الحمراء كان سنة 1821 فى تكريم الرئيس «جيمس مونرو» بولاية «كارولينا الجنوبية» بالولايات المتحدة، وتم تكريمه بالقرب من النهر وتم مد سجادة حمراء كبيرة وصلت حتى النهر!

وبدء استخدام السجادة الحمراء بشكل تقليدى فعلا عن طريق السكك الحديدة الأمريكية فى القرن العشرين، وكان الغرض هنا هو ان المسافرين على القطارات المتجه لـ نيويورك وشيكاجو يحسوا بفخامة الرحلة وتفردها!

جراحات التجميل.. نشأتها وأهميتها النفسية

الجمال مش بس جمال الوجه، ولكن جمال الجسم وإحساسك بالرضا عنه مهم ومهم جدا كمان، وجمال الوجه يأتى نتيجة لمجموعة من العوامل زى صحة البشرة ونضارتها وتناسق الأنف مع الخدود والجفون وحتى الشكل الجمالى للحاجبين.

والجراحات التجميلية عندها القدرة على إعادة النضارة للوجه وكمان إعادة البشرة لحالتها الطبيعية الجذابة، وده عن طريق عمليات زى شد الجفون وإزالة الحبوب الدهنية من تحتها، وجراحات شد الوجه والرقبة وجراحات تجميل الأنف، كمان فى عمليات أبسط زى ملء الخدود وأسفل الجفون والشفتين وإزالة التجاعيد بالبوتوكس أو ملئها عن طريق مواد مماثلة لأنسجة الجلد الطبيعية.

وجراحات التجميل ممكن تساعد على إعادة تناسق الجسم عن طريق شفط الدهون وشد الترهلات فى أجزاء الجسم المختلفة.

ومن أحدث التقنيات المستخدمة فى عالم التجميل اليوم هى تقنية الليزر واللى عن طريقها يمكن إزالة الشعر الزائد وعلاج البقع الجلدية وإزالة أثار الجروح وشد الوجه.

الفراعنة كان عندهم أطباء تجميل!

تاريخ وبدايات الجراحات التجميلية بيرجع لـ أيام مصر القديمة «الفرعونية»، الباحثون اكتشفوا أوراق بردى عليها صور العناية بالجروح فى الكتابات الهيروغليفية، وكمان بالهند القديمة كان «الطبيب ساشروتا» اللى استخدم طبقة من جلد الجبهة لأعادة بناء أنف مريض بالقرن السادس قبل الميلاد، أول طبيب تجميل حقيقى يعرفه التاريخ!

ويعتبر ساشروتا الهندى أبو الجراحة الحديثة وعاش بالمدينة الهندية «كاشى» وكان جزء كبير من ممارساته بالجراحة التجميلية فى شكل عمليات تجميل الأنف.

جراحات التجميل اتطورت أكثر على يد الجراح الزهراوى فى فترة حكم الدولة الاسلامية فى قرطبة بالقرن العاشر.

وبعد الحرب العالمية الأولى تطورت أكثر وأكثر، خصوصاً مع الجراحات اللى اجراها السير هارولد جيليز على إصابات الوجه للجنود اللى تعرضوا للتشوهات فى الحرب، وساعده على إتمام الجراحات دى تقنية التخدير الآمن اللى طورها السير إيفان ماجيل.

وتطور مفهوم الجراحة بصورة أكبر بكتير مع القرن العشرين ومع تطور فهم الأطباء لتشريح الانسجة الرخوة بالتفصيل، واللى بدوره ساعد على حدوث طفرة فى مجال جراحات الوجه وتوسيع الانسجة وظهرت مجموعة جديدة من التقنيات فى جراحات ترميم الوجه وغيرها..

الجراحة التجميلية مش مجرد ترف ولا فلوس زيادة!

والجراحات التجميلية مش مجرد رفاهية أو انفاق أموال زائدة بشكل غير عقلانى وترفى، ولكن جراحات التجميل لها آثار كبيرة على نفسية المريض، فمثلاً هناك بعض الحالات المصابة بأكتئاب مزمن بسبب - تشوه خلقى - تعانى منه يمكن انه يؤدى بصاحبه للأنطواء ووقتها يكون الحل فى الجراحة التجميلية اللى وقتها هتكون أكبر علاج نفسى له وتزيد من أقباله على الحياة، كمان حالات استئصال الثدى بسبب سرطان الثدى بتسبب اكتئاب لمعظم السيدات، الجراحة التجميلية اللى بتعالج الموضوع ده بتساعد المرأة على استعادة ثقتها بنفسها، كمان ضحايا حوادث الحرائق او إصابات الحروب...الخ.علشان كده أطباء التجميل بيسعوا دائما فى المجال ده على تطويره واستحداث تقنيات جديدة فى الجراحات والخروج من الجراحات دى بأقل أضرار ممكنة.

إزاى تختار طبيبك المعالج ؟!

• اسأل عن مؤهلاته وخبراته

• أسأله كام مرة عمل الجراحة دى قبل كده ؟

•ايه الرعاية المتوقعة بعد العملية ؟

• تأكد من أن العيادة والطبيب والممرضات مسجلين عند الجهات المختصة

• اتكلم مع الجراح نفسه عن مخاوفك واطلب منه النصيحة وكلمه عن حالتك الصحية بوضوح، ولو بتاخد أدوية معينة لمرض معين.

• اسأله عن العملية الجراحية نفسها. مدتها، والتخدير اللى محتاجه، والألم المتوقع، ومدة الشفاء

8نصائح لتمرين ممتع على الـ Treadmill

أسهل رياضة ممكن تمارسها وتساعدك على استعادة لياقتك البدنية هى رياضة المشى او الجرى. النوع ده من التمارين الرياضية سهل وبسيط وممكن تمارسه يوميا

ومن أسهل الاجهزة الرياضية اللى ممكن تمتلكها وتساعدك هى جهاز المشايه الكهربائية. بيساعد على حرق الدهون والسعرات الحرارية وتقوية وشد العضلات وخصوصا عضلات الساق والارداف، وكمان بيقوى اربطة الركبة وبيحسن وظائف القلب والرئتين وبيساعد على تنشيط الدورة الدموية بشكل عام.

طيب، إزاى تقدر تستفيد من الجهاز ده بأقصى طريقة ممكنة وفى نفس الوقت تستمتع بالتمرين؟

• متستعملش جهاز الـ treadmill وانت حافى ابداً، واحمى رجليك بحذاء رياضى مناسب ومريح ومصمم للجرى, يفضل لو تلبس ملابس خفيفة علشان متسببش اى صعوبة او تضايقك فى الجرى على المشاية.

• طبعا مهم جدا انك متلعبش على الجهاز وانت معدتك مليانة ولسه واكل، ومتشربش مياه بنسبة كبيرة كمان لأنك فى الحالتين مش هتقدر تلعب خالص.

• متبصش على رجليك وانت بتجرى لأنك بتعرض نفسك لخطر فقدان توازنك، وكمان مع استمرار الوضع ده لفترة طويلة فأنت بتأثر بالسلب على فقرات الرقبة. ارفع رأسك وافرد ظهرك وبص قدامك وانت بتجرى.

• لو حسيت بدوخة او دوار وانت بتجرى استخدم ادوات الامان بالجهاز، وتجنب خطر انك تتعرض لكدمة أو إصابة نتيجة للسقوط المفاجى من على المشاية الكهربائية.

• زود سرعة ووقت التمرين على الجهاز تدريجياً، كل فترة حسب قدراتك وقوة تحملك ومجهودك

• اتنفس بهدؤ وتحكم ومع الاستمرار فى التمرين جسمك هيظبط نفسه فحافظ على هدوئك وعلى معدل ضربات القلب وتنفس بدون تعب.

• متوقفش التمرين فجأة، ولكن بعد الجرى أنتقل للمشى السريع وبعدها المشى البطئ. التوقف فجأة ممكن يخليك تصاب بالدوار.

• بعد الانتهاء من التمرين خد دش سخن، عشان تفك عضلاتك وتنهى تمرينك بشكل صحى، ويفضل أنك تأكل بعد التمرين بحوالى ساعة أو أكثر.

10 تغيرات إيجابية فى حياتك لما تقرأ أكثر

مدمنين القراءة موضوع معرض الكتاب ده مش بيفرق معاهم !

بنعترف أننا مدمنين وأننا بنحب القراءة وعايزين نقرأ كل اللى يقع تحت ايدينا وعارفين أن شراء الكتب بكميات كبيرة بيدمر الميزانية، أكيد وبرضه لأ مش عايزين نتعالج !

بالعكس إحنا هنساعدك تبقى مدمن قراءة انت كمان، علشان كده هنتكلم عن 10 تغيرات إيجابية فى حياتك هتلاقيهم لما تستمر على القراءة..

• القراءة مخرج طوارئ! لو حياتك معقدة او هتبدأ تدخل فى حالة اكتئاب أو الملل بيسطر عليك، فالقراءة بتقدملك حل عملى وسريع وأقتصادى، زور أقرب مكتبة لك واشترى كتب مسلية أو ادخل على أى مكتبة من المكتبات الإلكترونية وحمل منها روايات وانسى العالم الحقيقى فى وسط عالم جديد من الشخصيات الخيالية !

• عائلة جديدة وقرايب جداد! طبعا انت عندك عائلتك وعندك قرايبك اللى بترتاح لوجودهم وبتحس معاهم بالونس، لكن لما تبدأ تحب القراءة هتلاقى نفسك جزء من عائلة جديدة وكبيرة بتحبك وبترحب بيك طول الوقت وهى عائلة القُراء ومدمنين الأدب. ودول مش واحد ولا اثنين بالعكس دول كتير ومنتشرين فى العالم كله وليهم تحية سرية كمان هتعرفها اول ماتبدأ تدخل العالم ده

• انت فى منطقة اللازمن واللامكان! الكتب قادرة أنها تنقلك من الوقت اللى بتعيش فيه لأى وقت تانى، سواء الوقت ده كان حاضر أو ماضى أو حتى مستقبل! وبتساعدك تعرف حضارات ومجتمعات موجودة معانا وانت متعرفش عنها حاجة، ده غير أنها بتساعدك تدخل فى حياة غيرك وتتعرف على العالم الخاص بيه ! يعنى لو فى يوم مثلاً زهقت من نفسك ممكن تدخل حياة «ستيف جوبز» وتعرف بنى الأمبراطورية الخاصة بيه إزاى!

• هتكون أفضل فى الكلام والكتابة! طبعا أسهل طريقة عشان تتعلم كلمات جديدة وتتجنب الأخطاء النحوية أو الإملائية هى أنك تقرأ، ومع الوقت واستمرارك فى القراءة عينيك هتتعود على النطق الصحيح للكلمات ومش بعيد كمان تبدأ تتعصب لو لقيت أخطاء لغوية ونحوية فى الـ mail اللى وصلك !

• القراءة أحسن علاج لملل الانتظار والطوابير ! واسأل مجرب، القراءة عندها قدرة عجيبة على تمرير الوقت يعنى بدل ما تكون مستنى وصبرك ينفذ منك وتغضب ممكن بكل بساطة تاخد معاك كتاب تقرأ فيه أو يكون معاك جهازك الألكترونى اللى عليه كتاب او أثنين تستمتع بقرأتهم وانت مستنى دورك.

• صدق او متصدقش بس القراءة هتساعدك تبقى شخص ألطف! لانها بتساعدك تختبر مشاعر أشخاص آخرين وبتحطك مكانهم وتخليك تفكر بطريقة تشبه طريقتهم فى التفكير ومع الوقت بيخلق منك شخصية ألطف، قادرة تفهم مشاعر غيرها وتقدرها وبدل الانتقاد والحكم بشكل متسرع هتلاقى نفسك متعاطف أكثر.

• هتكتشف انك متعرفش حاجة فعلاً ! كل اللى مكنش بيقرأ وبدء يقرأ بأنتظام أكتشف انه كان جاهل، وان معظم الأشياء اللى قرأ عنها زمان فى فترة دراسته مثلا تطورت عشان كده مهم أنك تقرأ وتعرف الجديد وتابع التطورات خصوصاً فى مجال شغلك ده أولاً وثانيا فى أى مجال تانى بتفضله. أبدء بالقراءة وهتكتشف أن فى حياة تانية فيها صور ومعلومات وكلام وتصورات وأحلام مكنتش تعرف عنها حاجة خالص !

• القراءة بتعلمك أكثر من المواد اللى كنت بتدرسها فى المدرسة والجامعة سوا، من خلالها هتعرف معلومات وخبرات ومعارف أكتر.

• القراءة بتعلمك الأبداع وبتغذى عقلك بأفكار ومعلومات جديدة ومع الوقت هتقدر تجمع بين أفكارك وبين المعارف والمعلومات اللى قرأتها وتخلق أفكار جديدة وتبدع فى مجالك.

• القراءة بتوسع الخيال! انت لما تبدء قراءة رواية معينة وتكون خيالية بتسأل سؤال واحد إزاى عقل الكاتب شطح منه كده وقدر يخلق عالم جديد بالكامل كده؟! النوع ده من الأسئلة بيخليك تثق فى خيالك الشخصى أكثر وتصدق قدراتك وإمكانياتك وتجرب كل جديد بتفكر فيه.

إزاى تتمرن فى الجيم من غير مشاكل؟

مخاطر التمارين الرياضية فى الجيم أكيد مش حاجة جنب الفوائد الصحية اللى بتعود على جسمك، لكن سواء كنت رياضى متمرس أو لسه بتبدأ فى المشى على خطة للرشاقة مهم انك تاخد بالك من الإصابات اللى ممكن تتعرض لها مع زيادة النشاط الجسدى اللى بتقوم بيه، لكن زى ما التمارين الرياضية لها مخاطر فكر فى التمرين:

• بشكل عام حتى التمارين متوسطة القوة، تعتبر آمنة جدا لمعظم الأشخاص حتى المبتدئين.

• الإصابات المتكررة بسبب التمارين عادة بتكون فى العضلات والمفاصل والعظام

• التمرين القاسى ولفترات طويلة فى الطقس الحار ومع نقص السوائل ممكن تؤدى للجفاف

• نسبة الإصابة بمشاكل خطيرة بالقلب بتقل بنسبة كبيرة مع الأشخاص الأكثر نشاطاً

• لو كنت جديد على ممارسة التمارين وجسمك خامل، أبدأ بالتمارين اللى بتحتاج نشاط منخفض أو معتدل زى المشى

• اختار التمارين المناسبة مع مستوى لياقتك البدنية، مثلا التمارين المتوسطة القوة بتساعد على تقليل الضغط على عضلاتك وعظامك ومفاصلك.

• زود التمارين تدريجيا، زود نشاطك الجسدى بشكل تدريجى بحيث تقلل من نسبة تعرضك للإصابة بسبب التمارين.. ابدأ بتمارين بسيطة وبطيئة وزودها مع الوقت

• إحمى نفسك فى التمارين من خلال مجموعة من الإجراءات الوقائية زى:

• اختيار المعدات الملائمة، مثلا اختيار حذاء مناسب للجرى بدلا من الحذاء العادى اللى بتلبسه كل يوم.

• إتمرن فى مكان آمن، اختار جيم مجهز بكافة أجهزة الأسعافات الآوليه.

• راقب حالة الطقس، يعنى لو الجو حار إتمرن وقت الصبح والجو لسه بارد شوية او اختار مكان مغلق تتمرن فيه.

• تابع مع طبيبك الخاص، خاصة فى حالة إصابتك بمرض مزمن أو فى حالة المرأة الحامل، وبعدها تقدر تمارس تمارينك الرياضية بدون أى خوف

إيه اللى المفروض تاكله قبل الجيم وبعده ؟

بالنسبة للتغذية قبل التمارين وبعدها، فالمدربين بينصحوا بعدم الأكل قبل التمارين مباشرة. وده لأن العضلات والمعدة بيشتغلوا فى نفس الوقت، العضلات على التمارين والمعدة على الهضم! وبالتالى بتصاب بالإضطرابات الهضمية أثناء التمارين.

من الناحية المثالية ممكن تاكل قبل التمارين بـ 1: 3 ساعات، بتقرر ده بناءً على الوقت اللى بيحتاجه جسمك فى هضم الطعام.

هتآكل أيه بالتحديد بحيث يساعد جسمك قبل التمارين ؟

• زبدة الفول السودانى، والموز، وزبدة الفستق والمربى.

• اللبن المطعم بالتوت مثلا، بس صناعة منزلية مش الصناعى المعلب !

• الشوفان مع الحليب قليل الدسم والفواكه.

• التفاح وزبدة اللوز والفول السودانى نفسه.

• المكسرات والزبيب.

كل الأغذية دى بتحتوى على البروتينات والكربوهيدرات، اللى بتشكل مصدر طاقة للجسم والبروتين بيساعد على إعادة عملية الأصلاح والبناء.

طيب وبعد التمارين هتآكل أيه ؟

وقت التمارين جسمك بيحول الطاقة المخزنة فى العضلات لقوة بيستخدمها أثناء التمرين واللعب، لكن بعد التمارين لازم تعوض جسمك عن العناصر اللى فقدها خلال التمارين وتزوده بالبروتين والكربوهيدرات فوراً.

ابدأ بتعويض الكربوهيدرات والبروتين بعد 15 – 20 دقيقة من إنتهاء التمارين،لإصلاح العضلات وانعاشها، وبعد حوالى 3 -4 ساعات إبدأ بأكل وجبة مختلطة نظامية.

الوجبات اللى بينصح بيها بعد التمارين:

• كوكتيل منعش تحضره من الحليب قليل الدسم والفواكه.

• حليب الشوكلاتة المنخفض الدسم.

• وجبة كاملة من الفراخ والخضار.

• لبن محلى

قوللى على نوع الموسيقى اللى بتسمعها أقولك أنت مين

فى دراسة جديدة قامت بها جامعة كامبرديج البريطانية وجدوا أن الذوق الموسيقى مرتبط جدا بطريقة تفكير الشخص! فعلى سبيل المثال وجدوا أن الأشخاص العاطفيين عادة بيفضلوا الموسيقى الشجية الهادئة، وعلى العكس الأشخاص اللى بيميل تفكيرهم للتحليل الدقيق بيفضلوا الموسيقى الانفعالية القوية!

الدراسة قام بها «ديفيد جرينبيرج» وهو طالب بالجامعة وعازف ساكسفون كمان، ونشرها فى صحيفة PLOSE ONE. شارك فى التجربة حوالى 4000 شخص مختلفين، قاموا بتعبئة استبيان مبنى على أساس علم النفس وسألوهم مثلاً اذا كانوا مهتمين بالتصميم وبناء المحركات وحل المسائل الرياضية الصعبة ولا عندهم قدرات أعلى فى التنبؤ بمشاعر المحيطين بيهم عشان يقدروا يقرروا هل الاشخاص دول عقلانيين ولا عاطفيين، وبعد ملى الاستبيان طلب منهم الباحثون أنهم يقييموا حوالى 50 قطعة موسيقية من حوالى 26 نوع من الموسيقى ويحددوا درجة إعجابهم بكل مقطوعة بدرجات من 1 لـ 10 .

الباحثون وجدوا فعلاً أن الأشخاص اللى سجلوا درجات عالية من التعاطف فى الاستبيان فضلوا مقطوعات الموسيقى الشجية الرقيقة زى موسيقى R&B والـ Soft Rock والموسيقى اللى لها عمق عاطفى بشكل عام. أما الاشخاص أصحاب التحليل الممنهج واللى بيتصفوا بالعملية بيفضلوا الموسيقى ذات الطاقة العالية والانفعالية زى موسيقى الـ Punk والـ Heavy Metal والنوع ده من الأشخاص الباحثون صنفوه تحت اسم «أصحاب العمق الدماغى»

«ديفيد جرينبيرج» الطالب الجامعى اللى قاد فريق البحث صرح بأنه على الرغم من أن اذواق الاشخاص الموسيقية بتختلف مع الزمن، لكنهم قدروا يربطوا بالبحث ده بين درجات التعاطف عند الاشخاص وبين طريقة تفكيرهم بنوع الموسيقى اللى بيحبوها.

وقال أن البحث ده هيساعد فى توصيات البرمجيات زى الـ SoundCloud او Apple Music فى اختيار نوع الموسيقى الأنسب للشخص عن طريقة معرفة طريقة تفكيره.

وبناءً على الدراسة دى انت كمان ممكن تحدد نوع تفكيرك، أرجع للـ Playlist اللى على موبايلك وشوف كده أيه نوع الموسيقى اللى بتحب تسمعها وهتعرف منها انت طبيعة تفكيرك بتميل لأى اتجاه، عاطفى ولا عقلانى؟!