الشاي الأخضر.. يحميك من التهاب المفاصل..ويطّول عمرك

الشاى الأخضر أصله من الصين، بس حاليا بقى منتشر فى جميع أنحاء العالم، بعد ما العلماء اكتشفوا الفوائد العديدة ليه، ودخوله فى الكتير من المنتجات الطبية..
طبعا فوائد الشاى الاخضر محتاجة كتابة كتير جدا، بس هنا احنا هنتكلم عن آخر دراسة صدرت فى اليابان وبينت أن تناول كوب واحد من الشاى الأخضر كل يوم، ممكن يقلل من خطر الإصابة بأمراض القلب والوفاة المبكرة.
دراسة أجريت على أكثر من 90 ألف شخص تتراوح أعمارهم بين 40-69 على مدى أربع سنوات، ووجدت أن شرب الشاى الأخضر كتير، بيقلل احتمالات الموت بسبب أمراض القلب والسكتة الدماغية وأمراض الجهاز التنفسى.
إحدى النظريات بتقول أن الشاى الأخضر بيحتوى على نسبة عالية من المواد المضادة للاكسدة، واللى بتساعد على تنظيم ضغط الدم والدهون فى الجسم.
كمان اكتشف العلماء أن الشاى الأخضر يبحتوى على مادة يمكن ان تكون الأساس فى صنع مستحضرات طبية لعلاج التهاب المفاصل الروماتويدى.
الفريق العلمى أكد ان المستحضرات الطبية المستخدمة حاليا فى تخفيف آلام التهاب المفاصل الروماتويدى غالية جدا ولا تصلح لاستخدامها فترة طويلة.
أما المادة الموجودة فى الشاى الأخضر،فهى قادرة على القضاء على ألم المفاصل وتخفيف الالتهاب ومنع اصابة انسجة الغضروف والعظم بالضرر.
و أختبر الباحثين المادة على الحيوانات المصابة بالتهاب المفاصل الروماتويدى لمدة 10 أيام، وكانت النتيجة انحسار كبير فى أعراض المرض، ويعتقد الباحثين أنهم هيقدروا يبتكروا فى المستقبل مستحضر طبى أساسه المادة المستخلصة من الشاى الأخضر لاستخدامه فى تخفيف أعراض التهاب المفاصل الروماتويدى.

 

ألم الأسنان مؤلم صحيح..بس أرحم من العدوى!

ألم الاسنان ألم رهيب، الناس دايما تقول أنه أصعب ألم، وبينافسه ألم الأذن بس، فطبيعى جدا أن الأسنان تبقى ليها معاملة خاصة جدا، لكن مع الألم الشديد والرهيب، فى قلق أكبر من الألم، وهو انتقال الامراض عبر الأدوات المستخدمة فى علاج الاسنان، زى الالتهاب الكبدى الوبائى، وغيره من الأمراض المميتة.
وللسبب ده بنلاقى أغلب المرضى بيفضلوا استخدام المسكنات عن الذهاب لعيادة الأسنان، إلا فى حالات الضرورة القصوى بسبب الحوف من العدوى.
طبعا مفيش طبيب اسنان هيقولك ان الأدوات مش معقمة، أو هيقولك أنه بيستخدم أساليب بدائية فى التعقيم، علشان كده لازم حضرتك تتأكد بنفسك من وسائل التعقيم ومستوى النظافة، سواء بالسؤال المباشر جدا، أو من خلال أحد المرضى اللى تعامل قبل كده مع العيادة.
يعنى لو اضطريت تروح لعيادة الاسنان لازم تاخد بالك من بعض الحاجات المهمة جدا، ودى اللى هتخليك تكمل مشوارك وتنتظر دورك، أو تخليك تلف وتطلع تجرى فورا..
والحاجات دى هى:
1 - النظافة عامل أساسى.. يعنى تشوف نظافة الأرضيات والحوائط، وفتحات التهوية لتجديد الهواء بداخلها وعدم انتقال النفس بين المرضى، والتهوية هنا مقصود بيها الشباك، لأن أجهزة التكييف مش بتجدد الهواء بطريقة صحية، مع تغطية الشباك بالسلك لمنع دخول الحشرات إلى الغرفة.
2 - كرسى العلاج الشهير .. يكون مرتب ومش متقطع، تاخد باكل من ملحقات الكرسى نظيفة ومرتاح لها ولا لأ؟ الحوض، أكواب المياه،الأدوات نظيفة، وده سهل جدا، لأن أغلب الأدوات لونها أبيض وبتظهر عليه النظافة أو عدمها بسهولة.
3 - الإضاءة لازم تكون قوية علشان تتأكد من دقة رؤية الطبيب لكل تفاصيل ومشكلات أسنانك.
4 - ارتداء الطبيب «للجوانتى» الجراحى قبل البدء فى الكشف على المريض، وفى حالة وجود مساعد له داخل الغرفة يكون هو كمان لابس «جوانتى» جراحى آخر.
5 - تشوف بنفسك جهاز التعقيم، والأدوات الصغيرة وهى خارجة منه قبل البدء فى استخدامها.

 

اعرف نفسك من طريقة قيادة سيارتك !!

 

زى ما قريت كتير عن الطرق المختلفة لتحديد شخصية حضرتك، سواء من طريقة لبسك أو من خلال لغة الجسد، أو من الأبراج والطالع، وغيره وغيره .. ظهرت دراسة برضه ليها علاقة بشخصيتك.
بس الدراسة دى ليها علاقة بطريقة «سواقة» حضرتك، أو قيادتك للسيارة، ويمكن تكون دى الدراسة الأولى من نوعها، واللى قامت بيها شركة «جوديير» للإطارات بالتعاون مع كلية لندن للبحوث الاقتصادية والسياسية.
الدراسة اتعملت بإجراء لقاءات مع مئات السائقين من دول أوروبية مختلفة، للوقوف على أنواع شخصيات قائدى السيارات، وكيفية التعامل معه.
وانتهت الدراسة لتقسيم السائقين إلى سبع فئات أساسية جاءت على النحو التالى:
1 - «المدرس» .. دايما بيعطى دروس للآخرين حول القيادة السليمة وعند الالتقاء معه لازم تقوله «نعم».
2 - «الموسوعة الحية»، معتقد أنه بيعرف كل حاجة أحسن من غيره، لما تقابله لازم تلاقى له «مدرس» علشان يتخانقوا مع بعض وتطلع انت منها وتكبر دماغك.
3 - «المنافس»، كتير بتلاقى جنبك وانت واقف فى إشارة واحد عايز يسبقك وخلاص، لا انت تعرفه ولا هو يعرفك، تجاهله تماما وسيبه يطلع امريكانى، ومتهتمش بنظرة المتمكن اللى دايما فى عينيه .
4 - «المعاقب»،هو «المدرس» نفسه، بس زياده عليه المعاقبة البدنية على تلقين الدرس، وعليك إنك متحاولش تتصرف تصرف خاطى معاه ولو حصل بلاش تبص فى عينيه.
5 - «الفيلسوف»، أفضل السائقين، لمّا تقابله، مش محتاج تعمل أى شئ.
6 - «المتفادي»، سائق يحاول تجنب كل الأشياء اللى بيعتبرها مصادر خطرة، والأفضل لك أن تتخذ موقف التجاهل معه.
7 - «المتجاهل»، اللى بيسمع مزيكا ويتكلم فى التليفون، مهم انك تاخد بالك منه لأنه مش هياخد باله منك.
 

بعد انتهاء الدراسة.. عرفت انت مين فيهم ؟

قولنا بقى .. انت مين من الـ7 شخصيات ؟

 

 

أسئله شائعه حول عمليات شفط الدهون؟

1. •من هم الأشخاص الأكثر انتفاعا من عمليات شفط الدهون؟

   عمليه شفط الدهون تناسب أى شخص لديه تكتل وتجمع دهون فى منطقه يصعب اٍزالتها عن طريق الأنظمة الغذائيه والرياضه ومن أكثر الاماكن شيوعا عند الرجال منطقة الكرش والصدر وعند السيدات منطقه البطن والفخذين. والغرض الأساسى من إجراء هذه العملية هو إٍعاده شكل الجسم لشكله الطبيعى فى أسرع وقت.
   

   •ما هى موانع إجراء شفط الدهون؟

   لا توجد موانع نهائيا لإجراء العمليه، حيث أنها تتم فى وقت قصير ولا تحتاج إلى إقامة بالمستشفى
   

   •ماذا يحدث داخل غرفة العمليات؟

   تعتمد عمليه شفط الدهون على استخدام جهاز لأزالة الدهون ومن ثم شفطها إلى الخارج، وهذة هى الطريقه الكلاسيكيه لشفط الدهون. وحديثا يستخدم جهاز الليزر فى إذابة الدهون كما يساعد على شد الجلد بعد العمليه.
   

   •ما هو المتوقع بعد شفط الدهون؟

   •يعود المريض لمزاولة حياته الطبيعيه بعد وقت قصير
   •ينصح بلبس الحزام الضاغط لفتره بعد العمليه
   •ينصح بشرب كميات كبيره من السوائل فى الأيام الأولى بعد العمليه.
   

   •هل يمكن التخلص من التجاعيد بواسطة إعادة حقن الدهون التى ازيلت من الجسم؟

   بالتأكيد يمكن إعادة حقن الدهون التى أخذت من الجسم بعد معالجتها بتقنيه حديثه بهدف إزاله التجاعيد مثل إعاده حقنها فى منطقه الخد.

 

3 نصائح من اغنى رجل في الصين كيف تصبح مليونير؟

وانج جيان لين»، رجل أعمال، أغنى رجل فى الصين، عنده 62 سنة، ثروته تقدر بـ30 مليار دولار، جناهم من خلال تأسيس شركته العقارية العملاقة «داليان واندا

جيان نشر كتابه الأخير وهو عبارة عن مجموعة من الخطب العامة بعنوان «نهج واندا»،

الكتاب بيبين فلسفة رجل الأعمال الصينى الإدارية، والقيم اللى حولت شركته إلى مؤسسة ضخمة ليها طموحات عالمية كبيرة.

«جيان» قدم 3 نصائح لكل واحد حلمه ان يبقى «ثرى» ..

1 - تميّز وابتكر

قال «جيان» فى كتابه ان «المفتاح الأول لطريق الثروة، هو أنك تفهم ازاى تقدر تميز نفسك عن الآخرين وتكون مبتكرا، فعلى سبيل المثال، كل الكافيهات بتعرف ازاى تبيع القهوة، لكن «ستاربكس» قدرت تعيد تصميم عملية صنع القهوة، وابتكرت نموذج أعمال تجارى وأصبحت سلسلة أعمال ناجحة.

2 - أقل أهدافك.. «كن الأول»

مافيهاش حاجة انك تبقى رقم واحد على العالم، جزء من نسيج النجاح،غرس الطموحات والأهداف على مستوى الشركة لجميع الموظفين من أجل بناء ثقافة الشركة المميزة، على حد تعبيره.

3 - لا تقرأ كتبا عن الفلسفة التجارية

أحد أهم الخصائص المميزة لنجاح «وانج» هو عدم ثقته الكاملة فى الكتب، وده بيشمل الكتب التى ألفها هو شخصيا.

وأضاف: «وانج» فى مقابلة صحفية لـ«سى ان ان»،لا يمكنك ببساطة نسخ النماذج التى أثبت أصحاب المشاريع أنها ناجحة، ومن فضلك لا تأخذ ما أتحدث عنه هنا اليوم كمادة تعليمية. وحذر وانج بأن ما ساعد على نجاح «واندا» قد لا يصلح لشركة أخرى، فالظروف والصناعات تتغير.

انت عارف إن عينيك دقتها 576 ميجا بيكسل ؟

13حقيقة لازم تعرفها عن العين

العين عليها حارس، مقولة شهيرة جدا، انت عارف طبعا ان عين الشخص نعمة غالية جدا جدا، بس انت أكيد مش عارف كل حاجة عن العين.. علشان كده بنوضحلك 13 حقيقة عن العين يمكن تكوم أول مرة تسمع عنها..

1 أنت ترى بعقلك وليس بعينيك

وظيفة العين هى جمع معلومات عن الشكل اللى بتشوفه، وبعدين يتم نقل المعلومات عن طريق العصب البصرى إلى الدماغ، اللى بيترجمها إلى أشكال وصور، يعنى العين زى عدسة الكاميرا، والدماغ هو فيلم الـ «نيجاتيف» اللى بتظهر عليه الصورة.

2 تستقبل شبكية العين الصورة بشكل مقلوب

لمّا توصل الصور لشبكية العين، فتنقسم لنصفين مقلوبين، وكل نصف من المخ بيقوم باستقبال نصف صورة معتدلة ويمزجهم مع بعض علشان تنتج فى النهاية صورة واضحة ومستقيمة فى المخ.

3 يختلف طول كرة العين فى حال قصر أو بعد النظر

إذا كان عندك قصر نظر، فانت عندك كرة عين أطول من المعتاد، وإذا كان عندك بعد نظر، فانت عندك كرة عين أقل من المعتاد.

4 بعض العيون ليها لونين

الحالة دى اسمها Heterochromia، ومعظم الحالات وراثية وأحياناً بتكون نتيجة التعرض لأمراض أو إصابات معينة.

5 تتشافى العين سريعاً

مثلا اذا حصل جرح فى قرنية العين، هيتم التعافى منها خلال 48 ساعة إلى 72 ساعة، بشرط توافر العناية الملائمة والعلاج.

6 معظم المسنين يعانون من المياه البيضاء

المياه البيضاء مجرد غشاوة بتتكون على عدسة العين، فتتسبب ضعف فى الرؤية، كمان بتحول عدسة العين إلى اللون الرمادى مع تقدم الإنسان فى السن.

7 العين = كاميرا 576 ميجابيكسل

البيكسل هو وحدة بناء الضوء، وميجابيكسل بتساوى مليون بيكسل، بدورهم قاس العلماء دقة العين مستخدمين معلوماتهم عن الشبكية التى تتكون من مخاريط (cones) تميز الألوان بتفاصيلها، والعصيات (srod) اللى بتميز الشكل ذاته باللون الأبيض والأسود.

بعد ما تقوم الشبكية بتمييز الألوان يتم تخزين الصورة فى العصب البصرى اللى بينقل الصورة للمخ ليتم ترجمتها، وكل ما فعله العلماء هو مقارنة تلك الأعصاب الموجودة بالعين بحساسية الكاميرات لغايو ما وصلوا بنتائجهم أن دقة العين تتعدى 500 ميجابكسل.

8 دليل على مرض السكر.

يعتبر نزيف الأوعية الدموية الموجودة خلف العين إشارةً قويةً على وجود مرض السكر، ويصبح المصابون بالسكر أكثر عرضةً لوجود المياه البيضاء فى أعينهم فى وقت مبكر.

9 الأطفال لا يميزون الألوان عند الولادة

الطفل بيشوف الألوان من وقت الولادة، بس مش بيقدر يميز كل الألوان بوضوح، قدر تركيزه ضعيفة على الأشياء التى تبعد عنه مسافة من 20 إلى 30 سنتيمتر، ما يجعل التمييز بين الألوان المتشابهة كالأحمر والبرتقالى صعباً جداً.

10 تحتوى العين على 107 ملايين خلية حساسة للضوء

يتكون الضوء من فوتونات صغيرة جداً،تسقط على الأجسام ثم تنعكس على العين، اللى بتحتوى فى شبكيتها على أعداد هائلة من الخلايا الحساسة للضوء تسمى مستقبلات الضوء.

تنقسم هذه الخلايا لخلايا عصوية أو مخروطية، ويوجد بها أنواع معينة من الصبغة البصرية التى تمتص الطاقة الكهرومغناطيسية من فوتونات الضوء وتحولها لإشارات كهربية تنتقل إلى الدماغ عن طريق العصب البصرى وسرعان ما يقوم الدماغ بترجمتها إلى أشكال وألوان.

11 التعرض المباشر للشمس يحرق العينين

احتراق العينين اللى بينتج عن إطالة النظر المباشر للشمس ناتج عن التهاب القرنية، فهى سريعة التأثر بأشعة الشمس، ما قد يسبب رؤية ضبابية وتضخم العين وتمزق خلاياها، يتم الشفاء من هذا الاحتراق فى مدة تتراوح من 24 إلى 72 ساعة.

12 القرنية بدون دم

القرنية عبارة عن نسيج شفاف ينكسر عنده الضوء لمّا يدخل العين، وهى لاتحتوى على أوعية دموية، تقع القرنية خارج العين، وبالتالى فإنها تحصل على الأكسجين مباشرة من الهواء.

13 العين ترمش كل 3 أو 4 ثوانى

مش محتاجة أى شرح

7حكايات من شوارع القاهرة القديمة

كل شارع فى مصر ليه أسم، وكل أسم ليه قصة، أسماء الشخصيات الشهيرة بيتم إطلاقها على الشوارع كنوع من التكريم والعرفان، زى شارع البطل أحمد عبدالعزيز، أو صلاح سالم وغيره، بس لما تلاقى شارع اسمه المبتديان، أو الموسكى، فمهم اننا نعرف حكايته..

تعالى نشوف حكاية اشهر شوارع القاهرة التاريخية..

1 - شارع المعز

حكاية إنشاء الشارع بترجع لفترة حكم القائد الفاطمى جوهر الصقلى اللى أنشأ مدينة القاهرة، وعمل فى السور الشمالى بابين، باب النصر وباب الفتوح، وفى السور الجنوبى، باب زويلة، وشق فى المنطقة من باب الفتوح إلى باب زويلة شارع أًطلق عليه فيما بعد شارع المعز.

على الجانب الشرقى من الشارع بنى الصقلى القصر الشرقى الكبير، لإقامة الخليفة المعز لدين الله، ولمّا تولى ابنه العزيز الحكم، أنشأ أمامه قصر تانى سماه القصر الغربى، وعرف الناس هذا الجزء من الشارع باسم «بين القصرين».

وامتد الشارع شمالًا خارج باب الفتوح إلى ميدان الجيش، لغاية حى الظاهر، ومن الناحية الجنوبية امتد بعد باب زويلة إلى مقام السيدة نفيسة، ثم إلى الفسطاط، ليصل فى النهاية طوله إلى حوالى 4800 متر.

2 - شارع قصر النيل

يرجع سر تسمية الشارع إلى عصر محمد على باشا، فهو أول من عمَّر منطقة قصر النيل، وجاب المهندسين الروم لإدخال المبانى الرومية فى مصر، وأنشأ لبنته نازلى هانم سرايا على ساحل النيل، وأُطلق عليها «قصر النيل».

وأصبح شارع قصر النيل الممتد من عند المتحف المصرى حتى تقاطعه مع شارع الجمهورية أشهر شارع تجارى فى القاهرة وشهد زحف من كبار التجار، وفى مقدمتهم التجار اليهود اللى أنشأوا العديد من المحالات المشهورة زى «صيدناوى» و«داود عدس» و«بنزايون».

3 - شارع عماد الدين

زمان كان شارع عماد الدين يمتد من شارع رمسيس إلى ما بعد شارع الناصرية بشوية، ولكن محافظة القاهرة قسمته إلى جزئين: الجنوبى منه يبدأ من الناصرية ويحمل أسم محمد بك فريد، ويصل إلى تقاطع شارع 26 يوليو، والشمالى لسة محتفظ بإسم عماد الدين ويبدأ من تقاطع شارع فؤاد ويصب فى شارع رمسيس.

العجيب أن الشيخ عماد الدين اللى سمى الشارع على اسمه، وهو صاحب الضريح الموجود بالقرب من تقاطع الشارع مع شارع الشيخ ريحان، محدش عارف تاريخ إنشاء الضريح، ولا أى حاجة عن الشيخ، لكن الضريح بعد عملية التقسيم بقى فى شارع محمد فريد.

4 - شارع الموسكى

بدأ تنفيذ شارع الموسكى وتعميره على مدار حكم خمسة من حكام مصر من أسرة محمد على، وكان الهدف منه توفير منطقة تجارية فى قلب القاهرة الفاطمية، ويمتد الشارع من السكة الجديدة – شارع الأزهر حاليًا – وصولًا إلى ميدان العتبة، وتنسب تسميته إلى الأمير عز الدين موسك أحد أقرباء السلطان صلاح الدين الأيوبى.

5 - شارع الأزهر

جت فكرة شارع الأزهر من الأزبكية، أى يسير بانحراف من الأزبكية إلى القلعة، وبدأ تخطيطه بإزالة المدافن التى كانت تقع فى بدايته، وشراء البيوت اللى فى طريقه، واستلزم تنفيذه هدم 700 بيت وعدد كبير من المبانى، زى جامع «قوصون»

وعندما بدأ تنفيذ فتح شارع الأزهر تمت إزالة جامع أزبك وحمامه، الذى كان معروفًا بحمام العتبة الخضراء، وجُمعت بقايا عظام الموتى الذين كانوا يدفنون فى مقبرة الأزبكية، ووضعت فى صهريج فى أول شارع العشماوى وبُنى عليه الجامع المعروف باسم جامع العظام.

6 - شارع محمد على

بدأ التفكير فى إنشائه أيام محمد على باشا، ولكن تنفيذه كان فى عهد الخديوى إسماعيل عام 1874، وأطلق عليه فى البداية أسم شارع القلعة، ولكنه يعرف اليوم باسم محمد على، ويمتد من ميدان العتبة، ويصل إلى جامع السلطان حسن، بلغت التكلفة الإجمالية لإنشائه حوالى 78645 جنيهًا و448 مليمًا.

7 - شارع المبتديان

اتغيَّر أسم الشارع كذا مرة، لكنه رغم كده لا يزال محتفظ بأول أسم أطلق عليه، المبتديان، أشهر شوارع حى المنيرة وسط القاهرة، ويبدأ من شارع قصر العينى وينتهى عند التقاء شارعى الناصرية وخيرت، وسبب تسميته بالمبتديان أنه فى يناير 1868 تم نقل مدرسة المبتديان إلى الناصرية مكان قصر عثمان بك البرديسى اللى كان بيستخدم لاستقبال واستضافة ضيوف مصر، والمبتديان كلمة تركية تعنى الابتدائية

10 خطوات قبل شراء شقتك

هيفضل دائما وأبدا سوق العقارات فى ازدهار، صحيح ممكن تصيبه بعض الأزمات لكن بتعدى بسرعة، وده لسبب مهم جدا، ان الزواج باقى ليوم القيامة، انت تقدر تستخدم مواصلات، تقدر تعيش من غير حاجات كتير، بس لازم تعيش فى شقة، حتى لو أوضة وصالة، الناس مش هتبطل تتزوج، وبالتالى البحث عن الشقة هيفضل مستمر.

وعلشان كده دائما سوق العقارات مضمون الاستثمار فيه، لان الطلب عليه دائم، صحيح فى فترات بيكون فيها ركود، زى شهر يناير وفبراير، بس الشهرين دول بالذات الركود فيهم على جميع المستويات، علشان كده التجار والمستثمرين بيدلعوا الشهرين دول بـ «ينايم» و«فقراير»..اسماء دلع يعنى مش أكتر..

وعلشان وجود الشقة مطلب اساسى لكل شاب أو فتاة، ظهر كتير من السماسرة وشركات السمسرة النصابين، ومهم جدا لما تروح تشترى شقة تبقى واخد بالك من الأمور دي..

1 - ابعد عن الدور المخالف غير الوارد فى رخصة البناء بأى حال من الأحوال.

2 - شوف مكان الشقة والشارع مرة فى النهار، ومرة بالليل، علشان تتعرف على المنطقة كويس مثلا، فى مناطق هادئة فى الصبح وبالليل يكون فى قهوة تحت البيت تسبب قلق شديد ومعاكسات للسكان.

3 - متخليش السمسار يوهمك ان الشقة «لقطة» ولازم تشتريها فورا، خذ وقتك واسأل كويس.

4 - لو رحت مع السمسار لشقة، روح مرة تانية بدونه واسأل فى المنطقة عن متوسط الأسعار من البوابين والسماسرة وإذا أعجبتك اتفق عليها واعط السمسار حقه.

5 - عند التفاوض على السعر تفاوض مع المالك مش مع السمسار، لأن بعض السماسرة بيزيد ويتشدد أكثر من المالك لأن نسبته بتزيد اذا جاب سعر جيد للمالك.

6 - اتأكد ان الشقة مسجلة بالشهر العقارى أم لا؟ واتأكد من الترخيص الخاص بالعقار وأنه يوجد به تلك الشقة، وكمان من سندات الملكية للبائع وهى عبارة عن عقد شراء الأرض وتراخيص البناء.

7 - لو كان البائع وريث من ورثة لازم تشوف إعلام الوراثة الخاص بهم وعددهم ونصيب كل فرد وأن يوقعوا كلهم على العقد، وفى حالة وفاة أحد من هؤلاء الورثة لازم برضه يكون هناك إعلام وراثة له أيضا ويوقع جميع الورثة لهذا الوريث أيضا.

8 - لابد أن يقوم البائع بالتنازل عن عداد المياه والكهرباء والغاز فى العقد فى إقرارات منفصلة فى الشهر العقارى ويتم التوقيع على العقد أمامك.

9 - البدء فورا فى إجراءات تسجيل الشقة كدعوى صحة ونفاذ أو عمل توكيل من البائع فى الشهر العقارى للبيع لك.

10 - فى البيع على أقساط يجب أن تثبت أرقام وتواريخ إيصالات الأمانة أو الشيكات فى العقد حتى لا يطالب بها مرة أخرى منفصلة عن العقد، ولازم ينص على تسلم البائع الثمن كامل وأنه سلم الشقة المبيعة وأنه مستعد لتقديم الأوراق الرسمية الدالة على الملكية للمشترى وقت طلبها وكل الأمور الأساسية فى العقد.

أصل أسماء أشهر المدن المصرية

القاهرة كوكب المريخ.. ودمنهور مدينة الاله حورس والفيوم بيت التمساح

 

كل أسم وليه أصل، يعنى لمّا نقول أسم محمد، فأصله كلمة «الحمد»، وانه الشخص كثير الحمد، وده بينطبق على جميع الأسماء اللى فى الدنيا، حتى أسماء المدن والمحافظات فى مصر ليها أصل، ممكن الكلمة الأصلية تتحور وتتغير لغاية ما توصل لينا، بس فى النهاية ليها أصل..
تعالوا نشوف مع بعض أصل أسماء أشهر المدن المصرية حسب بعض الروايات..

 

دمياط

كانت معروفة فى العصور الإغريقية والرومانية بأسم «تامياتس»، وكمان بأسم تاميات وتامياتى عند قدماء القبط قبل الفتح العربى، العلماء اختلفوا عن أصل الأسم، العالم داريسى يرى أن دمات-ن-بتاح-تنن أى مدينة الإله بتاح تنن هو الإسم المصرى القديم لدمياط
وإن لفظ دمييت أو ديمى تعنى مدينة، وقالوا أن اللفظ السريانى وهو دمط، بمعنى القدرة والمقصود بيه القدرة على الجمع بين الماء العذب والماء المالح عند دمياط.

 

القاهرة

لمّا بدأ جوهر الصقلى فى بناء القاهرة تصادف وجود قاهر الفلك فى السماء (كوكب المريخ) فقرر اطلاق اسم هذا النجم على المدينة الجديدة القاهرة، والقاهرة ليها أسماء كتير منها، قاهرة المعز، المحروسة ومدينة الألف مئذنة.

 

دمنهور

فى العصر البطلمى كان اسمها «هرموپوليس بارڤا»، كمان اتسمت «تيم انهود» فى كتب تاريخية، واسم دمنهور أسم مصرى قديم، جه من (دما.ن.هور) بمعنى مدينة حورس وهو نفس معنى أسم هرموپوليس، وكانت بتشتهر أيام الفراعنة بكترة المعابد الفرعونية، وبالذات معبد كبير للإله حورس.

 

الفيوم

معناها الأرض المستصلحة، وسمّيت «بر سوبك»، بيت التمساح، لوجود التماسيح فى بحيرة الفيوم لأن الإله سوبك، أى التمساح، كان معبودا فى الفيوم

 

المنيا

تطور أسم المنيا من الكلمة الهيروغليفية (منعت)، وهو اختصار لـ (منعت خوفو) أسم مرضعة الملك خوفو، وتطور الأسم إلى (مونى) فى القبطية بمعنى المنزل، ومنه جاء الأسم الحالى (المنيا).

 

الأقصر

الصولجان، واطلق عليها العرب هذا الاسم، الأقصر، جمع الجمع لكلمة قصر حيث جمع كلمة قصر (قصور) وجمع التكثير أو جمع الجمع (الأقصر)، وذلك نظرا للقصور والمعابد التى بها.

 

الزقازيق

عاصمة محافظة الشرقية، ويرجع أصل تسمية الزقازيق، نسبة إلى أسرة أحمد زقزوق الكبير وهم اللى أنشأوا كفر الزقازيق قبل قدوم محمد على باشا إلى مصر ثم نزلة الزقازيق التى أنشأها ابراهيم باشا زقزوق الكبير بجوار القناطر التسعة وهو من ذرية أحمد زقزوق الكبير.

 

أسيوط

اصلها كلمة (سيوت)، كلمة قبطية الأصل معناها «بلد المجد»،لما دخلها العرب بعد صراع مرير مع أهلها تمت تسميتها بإضافة حرف الألف فى بدايتها (أسيوط)،لما احتل الفرنسيون مصر كانوا يضيفون آداة التعريف Aقبل أسم المدينة سيوت ثم تداولها الناس حتى بقت اسيوط

 

بنى سويف

كانت مدينة بنى سويف الحالية إحدى القرى المصرية القديمة الواقعة على الضفة الغربية للنيل ومرفأ لمدينة أهناسيا الحالية، وكانت تسمى بوفيسيا POUPHISEA، وقد حرف هذا الأسم فيما بعد لينطق بنى سويف.

 

قنا

فى العهد الفرعونى أسمها: شابت، وأسمها الاغريقى: كينيويوليس، وفى عهد الآسر الرومانية كان اسمها، مكسيميات، وبدخول المسيحية اسمها القبطى: قوته اوكوتة، اسمها العربى: اقنى ومنه اسمها الحالى قنـــا

 

قواعد ضمنت نجاح محرك البحث الشهير "جوجل" 7

 

إذا كنت من عشاق الانترنت ومهتم بكل جديد فيه، يبقى اكيد لفت انتباهك محرك البحث الشهير جوجل، الشركة العملاقة واللى بتتقدم يوم بعد يوم، واللى بتسيطر على أكثر من سبعين بالمائة من سوق أسهم محركات البحث وحاملة على أكتافها أكثر من مليار مستخدم حول العالم، وبتحقق دخل سنوى بقيمة 30 مليار دولار، كل ده والشركة تاريخها 18 سنة بس ..

الأرقام اللى تعتبر خيالية مجتش من فراغ، الموضوع ببساطة سيستم كامل وقواعد تم وضعها من بداية انشاء الشركة وفضلوا مستمرين عليها..

1- البساطة والفاعلية

البساطة وسهولة الاستخدام من أهم مقومات نجاح أى مشروع، نجحت جوجل فى ضمان الميزة دى للمستخدمين، حتى الطفل الصغير يقدر يفهم طريقة الاستخدام من أول مرة، وبمجرد نظرة سريعة على الصفحة الرئيسية نفهم معنى البساطة.

2- العمل الجماعى

العمل الجماعى كان ولايزال العامود الفقرى للشركة من بداية لارى بيج وسيرجى برين (مؤسسى جوجل)، بس المضحك فى الأمر أنهما متفقوش فى الأول، وكانت بينهم حرب كلامية يتخللها الكره، بس مع مرور الوقت اكتشفوا أن الاختلاف هو البداية، واتعلموا درس مهم، أن العملية الإبداعية التى تقودها عقول ذات أفكار مختلفة تؤدى إلى نتائج أفضل بكتير من اللى تقودها عقول بنفس الأفكار.

3 - كويس مش كفاية

طول مشوار جوجل كانت كلمة جيد (كويس) مش كفاية، فعملاق محرك البحث كان دائمًا فى رحلة البحث عن الكمال، ببساطة الجيد مش كفاية بالنسبة للشركة، الجودة الى اكتسبتها منتجات جوجل نتيجة السياسة دى معروفة للمهتمين، فالشركة مش محتاجة لحملات إعلامية ضخمة، زى حملات شركات محركات البحث التانية، ياهو وبينج، فالسمعة الجيدة هى أفضل من ألف حملة تسويقية.

تذكر دائمًا عند البدء بمشروعك: لا تجعل شركتك تستريح فى الظل بسبب مدح الآخرين، استمر فى التحسن.

4 - سياسة الاستخدام المجانى

جوجل بتطرح الخدمات اللى محتاجها الناس بدون أى مقابل مادى من المستخدم، زى خدمة البريد،محرك البحث،جوجل ملفات، جوجل إيرث وغيرها، مع أنه كان من الممكن أن يدفع الناس مقابل الخدمات اللى لا غنى عنها فى حياتهم اليومية، لكن ورغم كل ده، قدرت الشركة تحقق دخل سنوى يقدر بثلاثين مليار دولار.

5 - الجودة

عند ذكر اسم جوجل يتوالى إلى عقول المستخدمين عدد من الكلمات على رأسهم الجودة ولهذا لا يمانع أحد فى دفع قيمة الإعلان مهما كان، فالإعلان فى جوجل يعنى النجاح بالإضافة إلى استعداد بعض المستخدمين فى دفع المال للحصول على بعض الخدمات غير المجانية لتوفر الجودة المطلوبة التى لا تتوفر فى كل المنتجات المنافسة.

6 - ما فى جوجل يبقى فى جوجل

تعتبر خوارزمية تصنيف وترتيب الصفحات اللى بيعتمدها محرك البحث من أكبر الأسرار التقنية فى القرن الواحد والعشرين، وده اللّى خلاها فريدة من نوعها، فحماية الأسرار الخاصة بالشركة ومنع عملية نسخها والاستفادة منها من قبل الشركات المنافسة، هو ما يكسبها قيمتها الخاصة ويكسبها شخصية فريدة.

7 - سياسة الفائدة العامة

إن شعار الشركة غير الرسمى هو «لا تكن شريرًا»، فهى لا تقوم باستغلال المستخدمين أو المطورين، فمنتجات جوجل معروضة للكل بدون فائدة مباشرة من المستخدم، وحتى المشاريع الصغيرة التى تستخدم منتجات جوجل لها الحرية التامة فى الاستفادة من الخدمة المعينة وهكذا يستفيد الكل.

السارى.. أسطورة الهند فى مصر

أكتر حاجة بتميز دولة الهند هى الأزياء المبهرة والاستعراضات، ومع التطور الرهيب فى صناعة الأزياء الهندية سنة ورا سنة، إلا أن السارى فضل هو الزى الرسمى لنساء الهند، مع بعض الإضافات زى: البلوزة وغيرها..

و السارى هو الزى الأساسى لنساء الهند، ويتكون من قماش طويل يلف على الجسم بأكتر من طريقة، وبتكون ألوانه زاهية بتزيد المرأة حيوية.

وهو أكتر زى تم استخدامه بشكل متصل لأطول فترة فى تاريخ البشرية، وبتلبسه أكتر من مليار سيدة فى الهند وسريلانكا وبنجلاديش ونيبال وباكستان، وبيرجع تاريخه إلى 5000 سنة، لمّا تم ذكره لأول مرة فى الكتاب المقدس للهندوس «ريج فيدا»، أقدم عمل أدبى فى العالم، حيث يعود تاريخه لسنة 3000 قبل الميلاد.

وفى الأصل، كان السارى مصمم للرجال والنساء، فهو عبارة عن قطعة طويلة ومستطيلة من القماش غير المخيط، ويتراوح طوله بين ست وتسع ياردات، ويلف حول الجسم بأشكال مختلفة.

وتختلف أشكال السارى والخامات المصنوع منها وأشكال ارتدائه من مكان لآخر فى أنحاء الهند المختلفة.

وفى عالمة فرنسية اسمها شانتال بولانجيه، فضلت ست سنوات فى الهند فى محاولة لجمع معلومات عن الأساليب المختلفة لارتداء السارى، وخلال الفترة دى، اكتشفت شانتال أكثر من 100 طريقة مختلفة للبس السارى فى الهند.

وشكل «الساري» اختلف مع الوقت، كان زمان بشكل ودلوقتى بشكل تانى مع استمرار نفس الروح فى التصميم والأولوان المبهجة.. واحنا فى الموضوع ده بنرصد أهم المحطات اللّى مرت بيها الموضة الهندية وتطور شكل السارى.

الهند من الدول الشهيرة بالأزياء والموضة منذ عصور ما قبل الميلاد، واكتشف العلماء وجود بقايا ملابس من حياة الهنود القدماء، وكمان اكتشفوا تماثيل بتوضح الملابس فى العصور القديمة، وكانت المرأة الهندية بتلبس ملابس بتغطى الجسم بالكامل، وتشبه السارى إلى حد كبير، وكانت معظم الملابس مصنوعة من القطن، وكانت الطبقات العليا من المجتمع بتلبس الملابس الحريرية الفاخرة، فى حين كانت الطبقات الأقل اجتماعيًا بتلبس الملابس المصنوعة محليًا.

فكانت نساء الطبقة العليا بتلبس سارى من الحرير مستورد من الصين، والطبقات المتوسطة والفقيرة بتلبس سارى من القطن وخامات تانية.

وكانت المجوهرات شيئ مشترك بين الرجال والنساء، فالأثنين بيلبسوا الحلق والأساور والخلخال والحلى من الذهب والفضة والنحاس والأحجار الكريمة، وكمان كان الرجال بيهتموا بشعر رؤوسهم بعمل تسريحات زى الكعكة فى حين لا يقومون بتربية اللحية.

اختلف السارى منذ العصور القديمة ولغاية دلوقتى، من قطعة قماش تربط حول الصدر إلى قطعة قماش تقص وتخيط حسب مقاس كل امرأة، وفضل التطور لغاية الشكل الحالى.

أشكال السارى:

1 - جاجرا كولى

شكل الملابس التقليدية فى مدينة راجستان الهندية، وهى عبارة عن فستان منفوش بيغطى كل الجسم مع سارى يربط حول الصدر

.

2 - السلوار القميص

شكل جديد للسارى، وهو بنطلون وبلوزة شبه السارى لحد كبير وهو يسيطر بشكل كبير على عروض الأزياء، وهى بدلة مكونة من قميص وبنطلون.

3 - الشوريدار

نسخة من السلوار ولكنه أطول قليلاً فهو تحت الركبة ويكون الشوريدار بنفس لون البنطلون

.

4 - لانجا دافانى

شكل الملابس التقليدية للفتيات الصغيرات وفى سن المراهقة، وهو ثوب مخروطى الشكل من الحرير ويتدلى إلى القدمين مع تطريزات ذهبية من أسفل.

5 - ميندم ريساتى

النموذج القديم للسارى، وهو الزى التقليدى للمرأة بولاية كيرالا بجنوب الهند.

6 - مع دخول الأزياء الغربية إلى الهند بجانب السارى أثناء الاحتلال البريطانى للهند، بدأت النساء تلبس الأزياء الغربية من البنطلون والبلوزات والتنورات فى القرن العشرين وأدخلوها إلى السارى.

8 صفات تخلّى الرجل يقع فى حب المرأة

فى العلاقات العاطفية والاجتماعية والإنسانية بتتفوق المرأة عن الرجل مفيش كلام، كل الدراسات اثبتت الحقيقة دى.

أحدث دراسة صدرت من الجامعة الفيدرالية البرازيلية أكدت على كده، بس مش هو ده موضوعنا، الدراسة كانت عن صفات المرأة اللى بيحبها كل الرجال، وحددتها بـ 8 صفات ميقدرش الرجل يقاومها..

1 - المرأة المتميزة:

أكدت الدراسة أن الحرية اللى بيتمتع بيها الرجل فى المجتمع أكبر بكثير من حرية المرأة، وبالتالى ممكن يعرف أكتر من امرأة، وبيعطى تقييم لكل واحدة فى قرارة نفسه، فلو قدر أنه يحس أن المرأة اللى قدامه تشد انتباهه من حيث إنها تختلف عن نساء تانية بسبب تمتعها بميزات خاصة، هتكون هى المحظوظة من حيث وقوعه فى حبها.

2 - اللى يخاف يفقدها:

الراجل بيتعلق جدا بالمرأة اللى بيحس بأنه ميقدرش يفقدها، لأنه لا يستطيع الاستمرار فى الحياة من غيرها، فإذا شعر بأنه مرتبط جامد بامرأة، ولا يقدر يتصور انه يفقدها أو حتى أنها تتخلى عنه، وقتها يمكن أنه يقع فى حبها.

3 - المرأة اللى بتحترم نفسها:

70 % من الرجال مش بيحبوا المرأة السهلة، اللى يمكن أنها تسلم بسهولة، معروف عن الرجل انه بيحب المرأة الصعبة، اللى بتحترم نفسها وتفرض احترامها على الناس، بل إنه يفضل أن تطلب منه أن يحترمها؛ لأنها ليست شيئاً لا قيمة له، بل هى إنسانة بحاجة إلى احترام الرجل لها بشكل كبير، النوع ده من النساء الرجل بيقع فى حبها

4 - السعيدة مع نفسها:

الرجل بيفضل المرأة المرحة، مش النكدية والكئيبة، لأن ده معناه إنها تقدر تسعد الآخرين. ومن المنطق أنه يفكر فى الاتجاه ده، لأنه ثبت أن المرأة المرحة قادرة أكثر من غيرها أنها تسعد اللى معاها.

5 - المرأة اللى يفتخر بيها:

نسبة كبيرة من الرجال بيقعوا فى حب المرأة اللى يمكن يفتخروا بيها لمّا تكون بجانبهم، ويعرفوها على الأقرباء والأصدقاء، وده يتضمن بشكل منطقى المرأة اللى بتعرف الاعتناء بنفسها، وتتمتع بذوق رفيع، وعارفة ازاى تتكلم وتظهر الذكاء فى حديثها.

6 - مش هتعقد حياته:

الراجل مش بيحب المرأة اللى هيحس إنها هتعقّد حياته، وده يتضمن انها متكنش مرأة غيورة جدا أو متحكمة، أو تخليه يحس أنه فى سجن ومقيد الحركة، والغالبية العظمى من الرجال لا يقعون فى حب المرأة المعقدة، اللى تعطى الشعور بأنها تعانى من عقد نفسية.

7 - المثيرة لاهتمامه طوال الوقت:

أوضحت الدراسة أن الرجل يحب جدا المرأة القادرة على إثارة اهتمامه بأسلوبها المرح وخفة دمها، وهذا ما يجعل الملل يطفو على السطح، فالرجل لا يحب المرأة المملة وكثيرة الشكاوى.

8 - اللى تساعده لمّا يحتاج مساعدة الرجل نادرا ما يطلب مساعدة المرأة إذا شعر بأن ده هيضعف من شأنه أو هيبته، بس إذا أظهرت المرأة أنها تهتم بالأمور دى، وأنها مستعدة لمساعدة رجل يحتاج للمساعدة، وقتها بتكبر فى عينيه.

 

مرض الموت المفاجئ
الأزمة القلبية ..أسبابها وطرق الوقاية منها

تعتبر الأزمة القلبية أخطر حاجة بتهدد حياة الإنسان فى العصر الحديث، وهى السبب الأول فى الوفيات حول العالم، وللسبب ده رحنا لاستشارى فى جراحة القلب والصدر، وطلبنا منه يوضحلنا أسباب الازمة القلبية، وعلاجها، وطرق الوقاية منها..

أسباب الأزمة القلبية

فى البداية لازم نعرف أهم أسباب الأزمة القلبية هو انسداد الشرايين التاجية، واللّى بتغذى عضلة القلب، سواء كان الانسداد جزئى أو كلى، وده اللى بنسميه «الذبحة الصدرية» أو «جلطة القلب»، كمان انقباض الشرايين التاجية بيسبب الأزمة القلبية، والرجفة البطينية أو الذبذبة البطينية، ممكن تؤدى الى التوقف المفاجى للقلب فى بعض الاحيان نتيجة اضطراب ضربات القلب وإهمالها.

أعراض الازمة القلبية

أما بالنسبة لأعراض الأزمة الطبية، فأولها وأبرزها الألم الشديد بالصدر، بيحس المريض بقبضة شديدة فى منتصف الصدر، ويستمر الألم الرهيب لدقائق، وممكن يمتد الى الكتف الأيسر، أو الرقبة، مع غثيان وميل للقئ، وصعوبة فى التنفس، وفقدان للتوازن، مع زيادة العرق، والأزمة القلبية بتحصل بصورة مفاجئة وحادة وبدون مقدمات فى معظم الأوقات.
لكن بعض الأعراض ممكن تظهر قبل الأزمة بأيام أو أسابيع، زى الآلام الخفيفة بالصدر واللى كثير من الناس بيتجاهلوها، أو يعتبرونها الم عادى، هيروح بعد فترة، بس لازم نهتم بأى ألم نشعر بيه فى الصدر، لأنه ممكن يكون إنذار لبداية حدوث أزمة قلبية، وكل ما كان إسعاف الحالة سريع، كل ما قلت نسبة حدوث الأزمات القلبية.

عوامل الخطورة

استشارى جراحة القلب والصدر بيحذرنا من العوامل اللى بتساعد على زيادة فرص الاصابة بالأزمات القلبية، زى، ارتفاع ضغط الدم، وارتفاع نسبة الدهون بالدم، والتدخين، وقلة النشاط الجسمانى، والبدانة، وارتفاع نسبة السكر بالدم، ولازم التحكم فى العوامل دى علشان نتجنب الازمات القلبية.

طب فى حالة حدوث الأزمة القلبية؟

لا قدّر الله، إذا كنت اصبت بأزمة قلبية قبل كده، أو بتعانى من أحد عوامل الخطورة، فمهم جدا انك تحتفظ بأقراص الأسبرين أو أقراص نيتروجلسرين لوضعها تحت اللسان لاستعمالها عند الشعور بآلام الأزمة القلبية.
وممكن يحتاج الأمر الى عمل انعاش للقلب فى حالات توقف القلب المفاجئ، بس ده محتاج تدريب خاص لإنقاذ الكثير من مرضى الازمات القلبية.
التدخل السريع والانتقال إلى أقرب مستشفى بيساعد على إنقاذ المريض بصورة كبيرة قبل تفاقم الحالة وتدهور عضلة القلب، ويتم فورا نقل المريض للعناية المركزة وعمل رسم القلب والتدخل الفورى لإذابة الجلطة بالشرايين التاجية باستخدام أدوية سيولة الدم، وضبط ضربات القلب.
وعمل جميع الفحوصات اللازمة لتشخيص الذبحة الصدرية أو جلطة القلب، وممكن يستدعى الأمر عمل قسطرة للقلب، لرسم الشرايين التاجية، وبيان مدى الانسدادات الموجودة فيها، ووضع الدعامات اللازمة لضمان سريان الدم بسهولة إلى عضلة القلب، أما إذا كانت هذه الانسدادات فى الشرايين لا يمكن علاجها بالدعامات، فيمكن عمل عملية توصيل الشرايين التاجية عن طرق عملية القلب المفتوح، وهى عمليات بتجرى فى العديد من المراكز الطبية المنتشرة فى مصر ونسبة نجاحها عالية جداً.

طرق الوقاية من الازمة القلبية

نقدر نتجنب الأزمة القلبية، بتجنب عوامل الخطورة، وممارسة الرياضة، وتقليل الوزن، وعدم الاستهانة بأى ألم بالصدر، واستشارة الطبيب المختص لعمل الفحوصات المطلوبة لبيان أى اصابة للشرايين التاجية فى بدايتها وعلاجها.
ولازم نعرف كويس ان التوقف عن التدخين، بيقلل من حدوث الازمات القلبية بصورة كبيرة، وكمان الأكل الصحى المتكامل، والبعد عن الدهون، والتوتر والشد العصبى

 

تكييف سيارتك شغال..خش ع الحر بقلب جامد

أهلا أمشير، شهر الزعابيب والتراب، والحر مع البرد، شهر الأمراض،شهر عجيب فعلا، تبقى نازل من البيت مش عارف الجو عامل ايه، هوا ولا لأ؟ سخن ولا بارد؟ تلبس تقيل ولا تخفف؟ أصل فى لحظة ممكن الحالة تتغير.. ما علينا..

بس بمناسبة دخول أيام من فصل الصيف واحنا أساسا فى الشتاء، ناس كتير مقدرتش تستحمل الحر المفاجئ، واضطرت تستخدم تكييف السيارة.. وهو ده موضوعنا..

طبعا سيادتك عارف أن تكييف السيارة لازم يشتغل مرتين فى الشهر على الأقل علشان يفضل محتفظ بكفاءته، بس على مين؟ يعنى أغلبنا مش بيعمل كده بسبب الجو البارد جدا، طيب ننقل على الخطة ب .. نعمل ايه؟

أول حاجة تطلع على البنزينة، تاخد العربية غسلة محترمة، وخاصة المحرك والصالون، وتخلى الراجل فى البنزينة بالهواء ينضّف فتحات التكييف تمام جوه وبره، وتفتح صندوق التابلوه وتنضفه كويس.

تاخد بعضك على بتاع تكييفات العربيات، تطلب منه يكشف على دورة التبريد كاملة، ويتأكد أن الفلتر كويس أو محتاج يتغير، وتظبط عنده التبريد، هل محتاج شحن فريون ولا لأ؟..فى الغالب هيحتاج.

شحنت وتمام التمام..تاخد بالك من الحاجات دى بعد كده

..

1 - لمّا تدخل سيارتك٬ افتح النوافذ أو حتى فتح الأبواب٬ للتخلص من الهواء الساخن.

2 - يفضل ترك النوافذ مفتوحة شوية فى أيام الحر علشان تحد من تراكم الحرارة جوه السيارة، وبالتالى التكييف يشتغل بشكل أسهل وأسرع.

3 - الأفضل من 1و2 أنك «تركن» سيارتك فى مكان بعيد عن الشمس لحماية التكييف، وده يعنى أن «الكمبروسور» الخاص بالتكييف يشتغل فترة أقل وهيساعد على الحفاظ على عمره الإفتراضى.

-4 يفضل إخلاء المناطق الواقعة تحت مقاعد السيارة الأمامية للسماح للهواء بالدوران فى كل انحاء السيارة.

5 - المحافظة على تنظيف المقصورة الداخلية للسيارة من الأتربة، حتى لا يتم سحبها مع الهواء الدائر لتجنب إعادة دفعه من فتحات التهوية.

اعرف اللى قدامك من لغة الجسد !

لغة الجسد مهارة اجتماعية مهمة جدا، بتديك القدرة على قراءة أى حد بيتكلم حواليك، وتحديد جزء من شخصيته، بعضنا بيقدر يقراها بشكل طبيعى، وبعضنا بتكون المسألة صعبة عليه، بس مع شوية تركيز هتلاقى نفسك قدرت تقرأ لغة الجسد، ومع الممارسة المسألة بتكون بسيطة وسهلة.

الخطوات:

1- اقتراب الجسد :

لو حد قرّب منك أثناء الكلام معناه دفء العلاقة وأنه بيفكر زيك، جرّب تقرّب من الشخص فإذا بعد عنك فهو مش عايز يتفاعل معاك، وإذا قرّب منك فهو مرتاح للكلام معاك.
مع ملاحظة أن مساحة الاقتراب بين الأشخاص بتختلف من مكان لآخر، ومن ثقافة لأخرى .

2-مشاهدة حركة الرأس:

ميل الراس بشكل حاد ممكن تكون علامة تعاطف، وإذا كان الشخص بيبتسم مع الإمالة، معناه أنه بيهزّر، لمّا بتنخفض الرأس معناه أن الشخص بيخفى حاجة أو تعبير عن الخجل، بعض الثقافات ميل الرأس علامة على الاحترام، أما الرأس الناظر للأمام معناه أن صاحبها يتحداك.

3- اتجاه العين :

النظر كتير إلى الجانبين معناه ان الشخص عصبى أو كاذب أو مشتت، النظر كتير للأسفل معناه أنه خجول أو متردد، بعض الناس لمّا يستاؤوا من حاجة ينظروا للأسفل، وغالبا لمّا يطول النظر للأرض فده علامة على التفكير فى عواطف غير سارة .
اتساع العين معناه أن الشخص مهتم، ولو كان النظر على نقطة بعيدة وغير محددة، فده معناه أن الشخص سرحان أو أنه مش سامع كلامك.

4- وضعية الذراعين :

الذراعين المتقاطعين، تعنى أن صاحبها صاحب نفوذ اجتماعى، رغم أن بعض الناس بتستخدم تقاطع الذراعين كـ"عادة"، ممكن يكون مجرد محاولة لإخفاء حاجة على قمصانهم.
لو ايديه خلف الرقبة أو الرأس باستمرار بحيث تكون مفتوحة، فده دليل على أن المناقشة مفتوحة، أما إذا كانت على أردافهم، فده دليل على أنهم فى وضع الانتظار أو بدافع التعب، ولو تم إغلاق أيديهم، بمعنى أنها تكون مضمومة، فإن صاحبها ممكن يكون غاضب .
أما إن كان الشخص عنده لا مبالاة، هتلاقى أنه حط ايديه فى جيبيه مع طأطأة الرأس، وممكن يدل أحيانا على الندم.

5- الإشارات العصبية :

فى اثناء كلامك مع الشخص، لو لاحظت ان أصابع ايديه فى خصلات شعره فده معناه أن أفكارك مش عاجباه، وإذا شفت الدهشة على وجهه اغلب الوقت فمعناه انه مختلف معاك.
امّا اذا كان الشخص لابس نظارة، وعمال يظبط فيها على انفه مع عبوس خفيف، فمعناه انه مختلف معاك، علشان كده اتأكد ان تحريكه للنظارة لسبب فعلى مش رد فعل على كلامك.
رفع الحاجب برضه دليل على عدم الإعجاب بكلامك .
واذا كنت بتشرح فكرة معينة، ولاحظت أن الشخص يحك أنفه، أذنه، أو ذقنه مع تحريك رأسه الى الأسفل والأعلى بأنه فهم اللّى تقصده، اعرف أنه مفهمش أى حاجة.

6- لغة أقدامهم:

القدم المنصوبة للأمام معناها أن الشخص صابر، متحمس، عصبى أو بيمر برهبة من حاجة.
نصب القدم للأمام: صاحبها بيمر بإثارة عصبية، أو أنه مش مرتاح للتواصل معاك .
إذا كان الشخص قاعد وحاطط رجل على رجل، فده يعنى سهولة الحوار معاه.
الشخص واقف وبيحاول دائما الحفاظ على قدميه قريبة جدا من بعض، فى بعض الأحيان معناها أن الشخص سلبى .
آخر حاجة مهمة جدا انك تعرفها، أن لغة الجسد بتختلف من شخص لشخص، فكل جسد ليه لغته الخاصة،و اللى بيطلق عليها اسم «المعيار»، وهى ببساطة حالة الشخص الطبيعية اللّى بيكون عليها بعيد عن أى نوع من الضغط أو الخوف، القلق، الحزن وكل العوامل التى ممكن تدفعه إلى إخفاء حقيقة أو مشاعر معينة.

,,رتب أفكارك وحدد مشكلتك تنتهى أزمتك المالية

,,رتب أفكارك وحدد مشكلتك

تنتهى أزمتك المالية

 

المال أو الفلوس، هو عصب الحياة فعلا، مهم وضرورى جدا سواء فى إشباع الرغبات أو تلبية الحاجات٬ الحصول عليه أمر ليس بالصعب، وفى نفس الوقت ليس بالسهل، كل مال ياتى يقابله جهد وعمل، لكن بالضرورة الجميع مرّ بأزمات مالية، تختلف صعوبتها من شخص لآخر، لكن دائما وأبدا تمر الازمات بحلوها ومرّها، فى السطور الجاية بنحاول نجيب على سؤال: تعمل ايه لو تعرضت لأزمة مالية؟

أول حاجة لازم تكون مؤمن بيها ان المسألة هتعدي، حتى لو طوّلت حبتين، وبشوية خطوات ممكن تخرج من الأزمة دي..

1 - ترتيب الأفكار

قبل بداية حل أى مشكلة مهما كانت لازم ترتّب الأفكار، وتعمل حصر للمشكلة بالكامل، بما فيها من مقدمات للأحداث وتقوم بدراسة المقدمات كويس وتفكر فى المشكلة بوجه عام وتحصرها.

2 - دراسة المشكلة

ادرس المشكلة وأسبابها علشان تقدر من خلالها الوصول إلى الحل، وإذا تتبعنا الأسباب هنعرف الخطر٬ وان قدرنا نحلها مننكررش الأخطاء اللى خليتنا نقع فى الأزمة.

3 - وضع الحلول الجذرية

وده من خلال التفقد فى الأسباب اللى أدت إلى المشكلة من الأساس٬ وبعدين نلاقى الحلول ليها وهذا ما سوف نعرضه فى النقاط الآتية:

1 - إذا كان السبب متعلق بتجميد الأموال فى الأسواق، علينا التوقف عن شراء أى منتجات تجارية جديدة، لغاية ما نجمع أموالنا من السوق ٬ بأسلوب شيق وبالصبر وطول البال.

2 - اما إذا كان السبب متعلق بكساد التجارة، يبقى نحدد سبب الكساد، هل لأنها سلعة غير مرغوب فيها؟ لأن أسعارها غالية جداً؟ لأنها فى غير وقتها أو فى غير موسمها؟ لعدم الإعلان عنها بطريقة مناسبة وجهل الآخرين بها؟

بعد تحديد سبب الكساد التجارى نقوم بحل المشكلة حسب المسبب لها فوراً، إن كان السبب أن السلع غير مرغوب فيها نبدأ نعمل عروض وهدايا علشان نلفت انتباه العملاء لهذه السلع وخلق الرغبة فى هذه المنتجات، أما إن كان السبب ارتفاع الأسعار، نقوم بخفض الأسعار فوراً حتى تتلاءم مع العميل وقدراته٬ أما إن كانت السلع فى غير موسمها نقوم بإصلاح الخطأ فوراً ونستبدلها بسلع تانية ماشية مع الموسم ٬ أما اذا كان السبب هو عدم الإعلان عنها بشكل كويس، فلازم تاخد حقها فى الإعلان ونروج لها بطريقة جذابة علشان يعرفها العملاء.

3 - أما إن كان سبب الأزمة هو التمنى الزائد والطموح المبالغ فيه لاقتناء حاجات زائدة عن الضرورة، بدون تفكير فى قدرتنا، وبدون التفكير فى العواقب، أول حاجة نتوقف فوراً، ونقوم ببيع بعض الحاجات اللى تم شرائها بطريقة مبالغ فيها وأدت إلى الديون، وبعدين نسدد بعض الديون بعد الوصول إلى وسيلة مع المدين للخروج من الأزمة.

4 - أما إذا كان السبب هو قلة الدخل بالمقارنة للمتطلبات الضرورية٬ فحل الأزمة هو استغلال وقت الفراغ والبحث عن عمل اضافى ٬ وبكدا نقدر نوفر الاحتياجات الضرورية بدون الوقوع فى أزمات مادية.

.

5 خطوات علشان تحافظ على شرب الماء بانتظام

لو سألت أى شخص عن أهمية شرب الماء هتلاقى بدأ يقول ويقول، كلنا عارفين أهمية شرب الماء كويس جدا، بس المشكلة الحقيقية اللّى بتواجه معظمنا، ازاى نحافظ على شرب كمية الماء المطلوبة كل يوم؟

شرب الكمية المطلوبة من الماء من أهم الحاجات لصحة الانسان، لأنه بيدخل فى معظم العمليات اللى بتحصل داخل جسم الإنسان، كمان ليه فوائد عظيمة، لكن كثير مننا أو أغلبنا مش بيقدروا يحافظوا على شرب الماء، وعلشان كده موضوعنا عبارة عن محموعة من النصائح اللى ممكن تسهّل الحكاية، بس خلينا فى الأول نتكلم عن أهمية الماء ..
العلماء أكدوا أن جسم الإنسان محتاج يومياً من لتر ونص إلى لترين من الماء، يعنى بمعدل من ستة أكواب إلى عشرة، وده بيحافظ على المعدل الطبيعى لنسبة الماء فى الجسم، واللى بتساوى سبعين فى المائة من الجسم، العلماء حددوا نسبة الماء فى العظم بـ 22 %٬ وفى العضلات بنسبة 73 %٬ أما الدهون فبنسبة 25 % .

وعدم شرب كمية كافية من الماء يؤدى الى الإعياء والشعور بالتعب، وده لأن الجسم مش هيكون قادر على إتمام العمليات والوظائف اللى محتاجها بصفة دورية، عدم شرب كمية كافية من الماء يؤدى لكثير من المشاكل زى، عسر الهضم والإمساك المزمن.
اما الفوائد فكثيرة، مع استمرار شرب الماء هتلاحظ تحس بحاجات كتير، مثلا هتحس إن البشرة أكثر نضارة، الفم رطب، التخلص من الرائحة الكريهة٬ التخلص من السموم الزائدة فى الجسم عن طريق البول والعرق لقيام الكليتين بأدائهما على الوجه الأكمل.
النصائح:
1 - أول حاجة لازم تعوّد نفسك إنك تشرب كوبايتين ماء على الريق، أول ما تقوم من النوم والأفضل يكون الماء بارد، ممكن تنبه نفسك كذا مرة عن طريق منبه مثلا، وبعد كده هتلاقى نفسك اتعودت.
2 - ممارسة الرياضة، مهم وضرورى جدا لكل إنسان، الرياضة ليها آثار إيجابية جدا، بالاضافة انها بتخليك تشرب كمية كبيرة من الماء.
3 - يفضّل شرب كمية كافية من الماء قبل وجبة الغداء بربع ساعة أو نص ساعة، الموضوع ده بيخلى المعدة أكثر راحة وأكثر استعدادا للهضم٬ كمان بيخليك تحس بالشبع بدون تناول كمية كبيرة من الطعام.
4 - الفاكهة والخضروات الغنية بالماء٬ من المصادر المهمة جدا لتزويد الجسم بالماء٬ فهى بتستحوذ على نسبة من 20 - 30 % من احتياج الجسم للماء٬ كمان بتساعد فى خفض درجة حرارة الجسم فى أيام الصيف، وفى كثير من الأغذية بتقوم بده، زى البطيخ والأناناس والبرتقال من الفاكهة، والخس والطماطم والبروكلى من الخضروات.
5 - من أهم الملاحظات اللى لازم تراعيها، شرب كمية كافية من الماء وانت فى مكان شغلك، خلى دائما زجاجة من المياه على مكتبك، وعليك انك تشرب منها كل شوية لغاية ما تبقى عادة .
شرب كمية كافية من الماء أمر ضرورى للحفاظ على صحتك، كما يجنبك الكثير من الأمراض.
حاول دائما أن تذكر نفسك بذلك، وأن تحافظ قدر الإمكان على النصائح السابق ذكرها وأن تحولها لعادات محببة

http://heyadenp.com/5-%D8%AE%D8%B7%D9%88%D8%A7%D8%AA-%D8%B9%D9%84%D8%B4%D8%A7%D9%86-%D8%AA%D8%AD%D8%A7%D9%81%D8%B8-%D8%B9%D9%84%D9%89-%D8%B4%D8%B1%D8%A8-%D8%A7%D9%84%D9%85%D8%A7%D8%A1-%D8%A8%D8%A7%D9%86%D8%AA%D8%B8%D8%A7/

خطوات أداء مناسك العمرة

خطوات أداء مناسك العمرة

العمرة، اسم من الاعتمار، فى اللغة القصد والزيارة، أما من حيث الاصطلاح الشرعى، فالعمرة هى زيارة المسجد الحرام فى مكة لأداء المناسك، اقتدءا بسنة الرسول الكريم محمد عليه الصلاة والسلام..

وللعمرة شروط أو مناسك لا تصح بدونها.. وهى:

الإحرام:

يقصد بـالإحرام: أن يكون المسلم ناوياً البدء بالعمرة، وقاصداً الذهاب إلى بيت الله الحرام، ويستحب للمسلم المعتمر أن ينطق بلفظة لبّيك عمرة، وذلك للدخول فى الإحرام، ثم يلبس أو يحرم فى إزار ورداء غير مخيط من جميع الجهات، ويفضل أن يكون لونه أبيض، ومن السنة أيضاً أن يغتسل المعتمر ويتطيب قبل نية الإحرام.

الطواف:

بعد الإحرام ينبغى للمعتمر أن يطوف الكعبة سبعة أشواط، كلّ شوط يبدأ من أمام الحجر الأسود، وينتهى عنده، وتكون الكعبة على يسار المعتمر، ومن سنة نبينا أن يسارع المعتمر فى الأشواط الأولى، ويجوز للمعتمر أن يجعل ردائه تحت كتفه الأيمن وطرفه على كتفه الأيسر، كذلك يجوز لمس الحجر الأسود، فإن لم يستطع أشار له من بعيد، إذا كانت صلاة الفرض قد أقيمت ينبغى أن يصليها، ثم يكمل الطّواف.

الصلاة عند المقام: من السنة أن يقرأ المعتمر عند المقام بعض الآيات القرآنية مثل:» واتخذوا من مقام إبراهيم مصلى»، كذلك من السنة أن يصلى المعتمر ركعتين عند المقام وهذا بعد طوافه، فى الركعة الأولى يقرأ « قل يا أيها الكافرون، وفى الثانية يقرأ» قل هو الله أحد». كذلك من السنة شرب ماء زمزم، ثم عليه أن يتوجه إلى الحجر الأسود إن استطاع، بعد ذلك يتوجه إلى الصفا.

السعى:

وهو سبعة أشواط بين الصفا والمروة، يبدأ من الصفا وينتهى بالمروة، وفى ذلك وردت الكثير من الأمور المستحبة من تلاوة الآيات القرآنية والأدعية .

الحلق أو التقصير: وهو من واجبات العمرة، فالرجل يحلق رأسه كاملاً أو يقصره، أما المرأة فهى تقصر من شعرها ولا تحلق شعرها. و

بعد الحلق يتحلّل المعتمر من إحرامه، وتنتهى العمرة.

 http://heyadenp.com/%D8%AE%D8%B7%D9%88%D8%A7%D8%AA-%D8%A3%D8%AF%D8%A7%D8%A1-%D9%85%D9%86%D8%A7%D8%B3%D9%83-%D8%A7%D9%84%D8%B9%D9%85%D8%B1%D8%A9/

أشهر 5 حدائق حيوانات فى العالم.. مع أروع الصور واللقطات الطبيعية

أشهر 5 حدائق حيوانات فى العالم

مش منها الجيزة طبعا!

مفيش بنى آدم طبيعى مرحش حديقة الحيوان، مش قصدى طبعا الموجودة فى الجيزة، أقصد حدائق الحيوان عبر العالم، لانها التجربة الأفضل والأمثل للأطفال، وتقريبا فى كل عاصمة من عواصم العالم فيه حديقة للحيوان.

ويوم بعد يوم أساليب الحدائق فى عرض الحيوانات بتطور، وبقى طبيعى انك تاخد جولة وسط الحيوانات، وده اللى عملاه قرية «أفريكا بارك» على طريق القاهرة الاسكندرية الصحرواى، صحيح مع الامكانات المحدودة، بس أهو تطور والسلام.

حديقة الحيوان بالجيزة تعتبر أقدم حديقة فى الشرق الأوسط، عمرها 125 سنة، أمر الخديوى إسماعيل ابنه محمد توفيق إسماعيل بتأسيسها عام 1891، وهو أول مَنْ فكر فى افتتاح حديقة حيوان فى العصر الحديث، علشان تكون ضمن المزارات السياحية لملوك وزعماء أوروبا، وأطلق عليها اسم "جوهرة التاج لحدائق الحيوان فى إفريقيا".

الحديقة مساحتها 80 فدان، وبتحتوى على حوالى ستة آلاف حيوان من نحو 175 نوعا، بينها أنواع نادرة من التماسيح والأبقار الوحشية.

وكانت رقم 3 على العالم، كانت، اما حاليا فهى خرجت أصلا عام ‏2003 من عضوية ‏منظمة حدائق الحيوان فى العالم والمعروفة باسم «waza»، بس ده مش موضوعنا، خلينا نتعرف على أشهر حدائق الحيوان فى العالم..

1)_ سان دييجو- كاليفورنيا

أكبر حديقة للحيوان فى العالم بفضل المجموعات الحيوانية والطيور اللى تحتويها، إلى جانب الحيوانات «التقليدية» الموجودة فى حدائق الحيوان، بتستثمر حديقة سان دييغو جهد كبير لزيادة معدل الإنجاب والبقاء على قيد الحياة لدببة الباندا المُهدّدة بالانقراض.

يقدر الزوار أنهم يتمتعوا بجولة فى الحديقة إما عن طريق ركوب العربيات التى تسير فى مسار محدد يضمن مشاهدة ورؤية مُختلف الحيوانات وهى طليقة وهو أحد الأمور التى تُميز حديقة سان دييغو، وإما عن طريق ركوب التلفريك الذى يوفر فرصة ممتازة لمشاهدة الحديقة من الأعلى على شكل بانوراما ساحرة.

2)_ زولى فى بازل- سويسرا

الأكثر إثارة للإعجاب فى أوروبا، تستعرض أكثر من 6000 حيوان من 600 نوع مُختلف. تُعرف حديقة الحيوانات زولى بنجاحاتها فى مجال الحفاظ على الحيوانات النادرة ورعايتها بأفضل صورة ممكنة، زى الدّب أبو نظارة اللّى بيعتبر من أندر فصائل الدببة، بالإضافة إلى حيوانات عديدة منها وحيد القرن الآسيوى، وغيره الكثير. وتحتوى الحديقة على ما يُسمى بغرفة الولادة، ودى من أكثر الأشياء اللى بتجذب الزوار، حيث توفّر هذه الغرفة فرصة مثيرة لرؤية الجراء التى وُلدت حديثًا برفقة الأمهات عن قُرب.

3)_ لندن- بريطانيا

تأسست حديقة الحيوانات فى لندن فى منتصف القرن التاسع عشر، وتعتبر واحدة من أجمل وأنجح حدائق الحيوان فى العالم، تحتوى الحديقة اليوم على أكثر من 600 نوع مُختلف من الحيوانات، وأغلب هذه الحيوانات تُصنف ضمن «القائمة الحمراء» للمخلوقات المهدّدة بالانقراض.

4)_ "أرتيس" فى أمستردام - هولندا

تأسّست سنة 1838، مدخل الحديقة مثير للإعجاب بشكل خاص لوجود تمثالين لنسرين ذهبيين. يستطيع الزوار أن يعيشوا أجواء القرن التاسع عشر من خلال المسارات المُتعرجة، والتماثيل المُنتشرة فى الحديقة، إلى جانب المبانى والهياكل ذات الطابع القديم.

تحتوى الحديقة على اكثر من 700 نوع مُختلف من الحيوانات والطيور، الأمر الذى يضمن للزوار التعرف بصورة واضحة إلى أنماط الحياة المختلفة لهذه المخلوقات، حيث تضم الحديقة العديد من أصناف الثديات، والزواحف، والطيور والحشرات.

5)_ أوينو فى طوكيو- اليابان

تأسست سنة 1882، تحتوى على أكثر من 2600 حيوان مُختلف من 464 سُلالة مُتنوعة، كما تنتشر فى أرجاء الحديقة العديد من العناصر التى تعود إلى التراث الحضارى اليابانى، مثل المعابد التى يعود تاريخ بنائها إلى عام 1631م، إضافة إلى عدة تماثيل وبيت للشاى بُنى خلال القرن السابع عشر.