مش لازم تقعد فى فندق وتركب القطر!!!
عايز تسافر ومتدفعش كتير؟
جمد قلبك واديها ..
اذا سألت اى شخص، بتحب السفر؟ هيجاوبك على طول، مين مش بيحب السفر؟ ولو سألته هتسافر امتى قريب؟ غالبا مش هتلاقى عنده اجابة !!
كل الناس لو بأيديها كانت سافرت ولفت العالم كله، بس المشكلة الحقيقية عند نفس الناس تكاليف السفر المزعجة للغالبية، وترتيب أولوياتهم من ناحية المصروفات المادية.
لكن مين قال ان السفر لازم يكون مكلّف؟ انت ممكن تسافر وتستمتع جدا بمصاريف عادية جدا، يعنى اللّى سيادتك بتصرفه بالفعل وانت عايش فى القاهرة! ازاى؟ تعالى نشوف تجارب شباب سافروا لبلاد كتير بدون أى أعباء مادية..
1 - سرير مجانى
مش لازم تنزل فى لوكاندة 5 نجوم أو حتى نجمتين، ايه رايك تسافر وتنزل فى بيت عائلة، وتأجر غرفة! فى مواقع شهيرة متخصصة فى السفر زى موقع Couch surfing ، الموقع ده بيديك فرصة حقيقية ان تسافر وتنزل ضيف على ناس تانية، لأن كل رواد الموقع من هواة السفر او المهووسين بيه، يعنى كلهم عندهم استعداد لاستضافة الغير، ومستعدين لمشاركة منازلهم مع أى عاشق للسفر زيهم. أوتنزل للمبيت مقابل خدمة، مثلًا يُمكنك فى مزرعة مقابل القيام بأعمال معينة، وده هتلاقيه على مواقع زى Workaway, Wwoof و .Helpx
2 - سافر مع مسافر
أسهل طريقة للسفر، انك تحجز أى تذكرة لأى مكان، ده أفضل حل للشخص اللّى معندوش مشكلة مع الفلوس، أما إذا كُنت من هواة السفر(الرخيص ) فالتخطيط المسبق للرحلة هيوفر عليك الكثير، تقدر تدخل موقع زى Bla
Bla
Car ، وتشوف شخص يسافر معاك!
الفكرة مش مجنونة، دى شائعة جدًا فى أوروبا عامة وفى ألمانيا بشكل خاص، لان البعض بيفضل اصطحاب شخص يسافر معاه بدل من السفر منفرد، فالبعض يببحث على حد يُساعده فى دفع الوقود ويُسليه طيلة الطريق مقابل دفع ثمن زهيد مقارنة بأسعار القطارات أو حتى الحافلات.
3 - السوبر ماركت أرخص
زى ما القاعدة بتقول(لا حياء فى العلم) القاعدة التانية بتقول (لا حياء فى التوفير) التوفير فى فاتورة الطعام، عليك أن تقرأ الكثير فى مجال الرحلات، لان اسعار الاكل بتختلف من بلد للتانى، فمثلا لو مسافر بلد فيها الاكل غالى، ممكن تاخد معلبات وأطعمة محفوظة، بلد زى الصين فيها الأكل العربى غالى جدا، وطبعا سيادتك مينفعش تاكل اكلهم اطلاقا،لانهم ببساطة بياكلوا أى حاجة ماشية على اربع أرجل، يعنى أى حيوان، مش محتاجة توضيح.
4 - الطبيعة مجانيّة
لو انت فى باريس، مش لازم تنزل الشانزليزيه وتتفرج على المحلات وتشترى، ممكن مش شرط تروح اللوفر وتقضى فيه اليوم وتدفعلك 300 يورو مثلا، فى اماكن طبيعية خلابة ممكن تستمتع بيها. الطبيعة تبقى دائمًا المكان الأفضل للاستكشاف والاستجمام مع أنها المكان الأرخص.
5 - ثلاثة فى واحد!
تكاليف السفر مش بسيطة، وخصوصا من دولة إلى دولة داخل أوروبا، يعنى سيادتك ممكن تتعب وتروح فرنسا، بس لمّا تعرف ان كلها ساعتين وتبقى فى المانيا أو انجلترا، فحرام عليك انك متروحش.
تجربة السفرعبر الحدود فى ظل الاتحاد الأوروبى بكل سهولة تجربة مميزة، كتير من الناس بتغتنم الرحلة علشان يعيش أجواء أكثر من بلد فى نفس الرحلة،على سبيل المثال، فى تل فالسيربيرخ، فى نقطة التقاء لثلاثة دول، هولندا وبلجيكا وألمانيا، وهناك تقدر تتنقل بين الدول الثلاثة خلال ساعتين زمن. تشرب القهوة فى بلجيكا وتطلع تتغدى فى المانيا، وتتمشى فى هولندا علشان تهضم الغدا!
ولو سيادتك معاك شوية فلوس، خد القطار من اى دولة اوروبية وخلال ساعات هتكون فى دولة تانية أو ثالثة .
ليست هناك تعليقات:
إرسال تعليق